El xefe de la Policía Llocal d’Uviéu, investigáu pola trama de presuntos amaños en contratos

José Manuel López, xefe de la Policía Llocal d’Uviéu, tuvo que declarar en comisaría como investigáu pola trama de supuestos amaños d’axudicaciones públiques pa regular el tráficu en decenes de Ayuntamientos de tol Estáu que llevó a entamar rexistros el martes. Aseguró a los medios a la salida que nun ta implicáu.

La operación ‘Enredadera’ comenzó nun xulgáu de Badalona y llevó ayeri a rexistrar cuatro decenes de Conceyos de too tamañu de tol Estáu, ente elles dalgunes capitales como Uesca, Lleida, Lleón, Palencia o Teruel. Uviéu foi la única ciudá asturiana baxo la sospecha de la Unidad de Delincuencia Económica y Fiscal (UDEF) de la Policía Xudicial, con axentes acudiendo a primer hora de la mañana d’ayeri a la Casa Conceyu y a la sede de la Policía Llocal.

Yá pela tarde, el xefe d’ésta última tuvo que declarar en comisaría en calidá d’investigáu, al igual que’l responsable del área téunica de la Llocal. López aseguró que nun tien nada que ver na supuesta trama y dixo tar mui tranquilu, al empar qu’aseguró que na so etapa nel cargu nun se fixo contratu nengún con Aplicaciones Gespol, empresa baxo sospecha.

Rueda de prensa del alcalde

Francisco Wenceslao López, alcalde d’Uviéu, dio ayeri una rueda de prensa pa esclariar el papel del Conceyu na investigación entamada pola UDEF. Nella apuntó qu’una de les empreses venceyaes a la trama corrupta apaez nun contratu del Ayuntamientu y que se presentó a un concursu públicu que nun llevó, puntualizando que dichu contratu ye de la época del Partido Popular nel equipu de gobiernu municipal.