El Gobiernu aprueba'l proyeutu de presupuestos rexonales del 2009, que sube 4.394 millones

"El Conseyu de Gobiernu del Principáu d'Asturies aprobó güei'l proyeutu de Presupuestos Xenerales del principáu pal 2009 que va unise'l llunes a la Xunta Xeneral del Principáu pal so alderique sube a 4.394 millones d'euros, cifra que representa un crecimientu del 7,68%, sobre l'añu anterior, lo que supón 4.070 euros por habitante. Unes cuentes que, según precisó en rueda prensa'l titular d'Economía y Facienda, Jaime Rabanal, ta en sintonía ""cola nueva y difícil realidá económica y diseñaes pa facer frente a los nuevos retos y necesidaes a los asturianos"".

Rabanal destacó que la inversión consolidada del sector públicu asturianu increméntase notablemente, con un 13% de crecimientu, algamando la cifra de 1.265 millones d'eruos, lo que supón 1.172 euros por asturianu. El proyeutu persigue asina estimular l'actividá económica, la creación d'emplegu y la consolidación d'un modelu basáu na productividá y la competitividá que permita contrarrestar los efeutos negativos del contestu de crisis. ""Si queremos facer frente a la crisis, nun hai otra salida que'l gastu públicu directu"", dixo Rabanal.

Los oxetivos del Presupuesto pal 2009, según Rabanal, son el caltenimientu de l'actividá económica, facer frente a la crisis, la consolidación del modelu de crecimientu asturianu, el reforzamientu de les polítiques sociales y l'austeridá.

El conseyeru d'Economía y Facienda esplicó qu'una de les consecuencies de l'actual situación económica ye la disminunción de los ingresos tributarios, añadiendo qu'Asturies posee un nivel d'adeudamientu inferior al restu de comunidaes autónomes, lo que permite contar con marxe de maniobra. Poro se recurrió al adeudamientu, y más concretamente, al llende máximu estipuláu pola flexibilización de la Llei d'Estabilidá, el 1% del PIB rexonal (242,2 millones d'euros).

Xunto a midíes escontra la crisis y el fomentu de la inversión productiva, el proyeutu de Presupuestos del 2009 tien una ""clara vocación social"", col reforzamientu de la prestación y la calidá de tolos servicios públicos. Nesta llinia, destínense 2.964 millones d'euros al gastu social consolidáu, incluyíes conseyeríes y organismos, lo que representa un 65,95% del proyeutu de Presupuestos.

El gastu sanitariu consolidáu, con 1.568 millones d'euros, y un 52,91% del gastu social, y Educación, con 954 millones y un 32,19% son dos árees nesa llinia. A ello súmase Bienestar Social, con 325 millones d'euros y un 10,97% del gastu social del proyeutu de Presupuestos.

Les estayes presupuestaries que baxen sobre l'añu pasáu son les correspondientes a Presidencia del Principáu y Conseyu de Gobiernu (5,2 millones y -2%), Sindicatura de Cuentes (5,8 millones y -2,09%), Procurador Xeneral (4,1 millones y -3,66%), Conseyería de Cultura y Turismu (146,8 millones y -0,12%).

Les que rexistren mayores incrementos porcentuales son les estayes de Xunta Xeneral del Principáu (15,6 millones y +15,21%), Conseyería de Vivienda y Bienestar Social (379 millones y +14,35%) y Conseyería de Mediu Ambiente, Ordenación del Territoriu y Infraestructures (365,1 millones y +13,54%).

Con un 8,70% d'incrementu, s'alcuentra la Conseyería de Presidencia, Xusticia y Igualdá, mientres que los recursos d'Industria y Emplegu van esperimentar una subida d'un 8,33% algamando los 225 millones d'euros. Mediu Rural y Pesca, con 208 millones, crez un 7,92%, mientres que Salú y Servicios fai lo propio con 1.563 millones y un crecimientu del 7,44%. Alministraciones Públiques cuenta con 196 euros, lo que supón una subida del 6,83%.

L'AUSTERIDÁ

Les cuentes del 2009 ellaboraes pol Gobiernu asturianu espeyen, amás, polítiques de ""austeridá"". Asina se refirió a la conxelación de los salarios de los cargos públicos y dixo que los recursos que se puean aforrar nel gastu corriente van poder destinase a inversión.

Tamién van conxelase sovenciones y partíes presupuestaries, y la Llei de Presupuestos recueye determinaes llendes pa dietes y llocomoción. ""Son gastos pequeñinos, pero que sumen"", comentó Rabanal. Tamién se rebaxa a 300.000 euros l'autorización que teníen los conseyeros pa gastar. Enantes, la llende taba en 500.000 euros. Según Rabanal, les midíes d'austeridá han algamar tamién a les empreses públiques, como entidaes y fundaciones."