TPA estrena'l programa Mundu Sidreru, dedicáu a la bebida más asturiana

La televisión pública asturiana va estrenar esti domingu un nuevu programa dedicáu a la cultura sidrera. Mundu Sidreru, presentáu pol periodista Inaciu Galán, va emitise los domingos a les 21:30 hores y cuenta cola collaboración de la DOP Sidra d'Asturies.

Mundu Sidreru ye un programa que percuerre toles facetes de la Sidra d’Asturies, visitando llagares, chigres, eventos y falando coles persones que más saben de la bebida insignia de la cultura asturiana, nestos momentos nos que la cultura sidrera asturiana vive un procesu de preparación de la so candidatura a Patrimoniu Inmetarial de la Humanidá.

El programa inclúi una receta fecha con Sidra d’Asturies pol cocineru Lluis Nel Estrada, asina como un concursu na cai, na que los participantes van poner a prueba los sos conocimientos sobre la Sidra d'Asturies, amás d'una entrevista con figures relevantes de la sociedá asturiana, alredor d’una botella y echando unos culinos n'espacios impactantes del paisaxe d'Asturies que se convierten en platós del programa.

Mundu Sidreru va estrenase cola presencia de Rodrigo Cuevas como entrevistáu central del primer programa. El reconocíu artista asturianu ta venceyáu a la sidra con especial fondura dende que nel añu 2016 se convirtiere na imaxe de la DOP revolucionando munchos de los conceptos alredor d'esta bebida tradicional.

El programa va suponer tamién una novedá nel campu de los medios n'Asturies, pues va cuntar con conteníos propios creaos a costafecha pa les redes sociales. La entrevista central, que nel programa tien una duración d'unos diez minutos, va poder continuase nes redes sociales con una estensión d'alredor de 20 minuntos en total.