La Xunta pola Llingua concede'l premiu Andrés Solar positivu al colectivu Softastur y el negativu a Fernando Lastra

"La Xunta pola Defensa de la Llingua Asturiana anunció güei quién son los gallardoniaos na edición de los premios Andrés Solar 2008. La versión positiva d'esta reconocencia, llamada 'El Pegoyu', ye pal colectivu Softastur, pol so llabor desinteresáu de traducción al asturianu de programes de software llibre. Per otra parte, la versión negativa, 'El madreñazu', ye pal voceru socialista na Xunta'l Principáu, Fernando Lastra, polo so actitú ""contraria"" a tou avance o meyora de la situación del idioma d'Asturies.

Al traviés d'un comunicáu, la Xunta informó del premiu a Softastur pol ""so llabor como plataforma de programadores y traductores en llingua asturiana dedicada a la traducción y desarrollu de software llibre n'asturianu"". Ente los proyectos de Softastur que se destaquen tán el Sistema Operativu Ubuntu, el caltenimientu del navegador Firefox en Llingua Asturiana, y el proyectu MediaWiki. Pa la Xunta pola Defensa de la Llingua Asturiana ye ""mui de valorar el trabayu constante y desinteresáu de les persones que formen parte de Softastur, abriendo camín pal usu de la llingua asturiana nel ámbitu de les tecnoloxíes nueves, volviendo a amosar que l'asturianu tien y pue tar en tolos ámbitos de la vida moderna"".

Per otru llau, la Xunta xustificó 'El Madreñazu' a Fernando Lastra, ""pol so papel desempeñáu a lo llargo de bien d'años cola so actitú contra tolo que suponga un avance o meyora pa la situación del asturianu, y especialmente nel últimu añu, pola so actitú contra'l reconocimientu de la llingua asturiana como llingua oficial d'Asturies nel testu del estatutu asturianu"". Explicó amás que ""ye ún de los ponentes que llanzó la propuesta d'artículu cuartu del estatutu, que condena al asturianu a ser una llingua fuera de la categoría que nel marcu constitucional se-yos da a les llingues propies del estáu"".

L'actu d'entrega de los Premios Andrés Solar va ser el día 20 d'avientu, nel Salón d'Actos del Antiguu Institutu de Xixón. D'equí a unos díes van conocese más datos sobre l'actu, que va facer el númberu 24 na so hestoria."