Valledor y UNA denuncien la destrucción d'una talla nun horru del sieglu XVI

"El portavoz d'IX-BA-LV, Francisco Javier García Valledor, y la formación política Unidá Nacionalista Asturiana acaben de denunciar públicamente la destrucción d'una talla del sieglu XVI nun horru de Llorío, nel conceyu de Llaviana. Mientres que pa Valledor ye una amuesa de la ""neglixencia"" de los responsables culturales del gobiernu asturianu, los nacionalistes presentaron una denuncia énte'l Serviciu de Patrimoniu de la Conseyería de Cultura.

Según el comunicáu de García Valledor, la talla destruida ""representaba una escena ideográfica de fertilidá na qu'una muyer embarazada copulaba al empar con dos homes"", siendo ""un grabáu únicu d'una escena de corte naturalista qu'emparenta cola tradición iconográfica asturiana sobre la fertilidá que llega hasta l'arte parietal paleolíticu"". La so desaparición ye pal dirixente d'IX un fechu ""gravísimu"", y ""mas grave entá porque dende los responsables políticos culturales nun se quixo tresmitir a la nuesa sociedá'l valor y significáu de la nuesa cultura tradicional nes sos estremaes y riques estayes: vivimos nuna Asturies na que desgraciadamente nun sabemos valorar la importancia, el valor descomanáu, que pa cualquier sociedá mínimamente culta y civilizada representa'l so patrimoniu artísticu y la so cultura tradicional"". Por too ello encamienta ""a la nueva Conseyera de Cultura a cambiar dafechu la orientación d'unes polítiques que llevaron a la destrucción d'una gran parte del nuesu Patrimoniu cultural"".

Pela so parte Unidá Nacionalista Asturiana presentó una denuncia énte'l Serviciu de Patrimoniu de la Conseyería de Cultura, tres les informaciones recibíes por esta formación política sobre la desapaición de la talla, básada na aplicación estricta de la Llei de Patrimoniu Cultural Asturianu. Esta norma, según la UNA, ""a pesar de tar en vixencia ya dende l'añu 2001, paez tener simplemente un valor decorativu y de declaración d'intenciones, porque nun sólo les midíes que contienen nun s'aplique poles sos propios autories, sinón que nin siquier son aumíes por ellos, como pasa munches ocasiones con otres lleis asturianes"". Pa la organización ""si de verdá se quisiere aplicar esta llei, y cuidar del nuesu patrimoniu tenía qu'haber un serviciu efeutivu de vilixancia y proteición del patrimoniu asturianu, y los autores de los destrozos nun quedaben impunes, como pasa na mayoría de los casos""."