Lluís Portal algama’l premiu de relatos “Xose Álvarez”

"Ta acabante de fallase una nueva edición del Premiu de relatu curtiu ""Xosé Álvarez"" que convoca'l Centru Asturianu de Madrid. El xuráu decidió premiar el cuentu tituláu ""Ferre o palomba"", del que ye autor el maliayés Lluís Portal Hevia. El xixonés Pablo Rodríguez Alonso algamó l'accésit ""León Delestal"" cola hestoria titulada 'L'Abadía'.

El relatu ganador narra una hestoria ambientada nos momentos previos a la guerra civil española y inspirada en fechos reales. Un anarquista ye infiltráu pola CNT nes files de La Falanxe -dirixida por un homosexual- d'una ciudá norteña, ésti conviértelu na so mano derecha, permitiéndo-y acceder a una información impagable sobre la identidá de los miembros y los arsenales de la organización facista, pudiendo neutralizalos na madrugada del 18 de xunetu de 1936, hores antes del golpe franquista.

Per otra parte ""L'abadía"" del escritor xixonés y historiador Pablo Rodríguez Alonso ye un rellatu más llargu que tien dos partes bien estremaes. Na primera l'autor ellabora un ensayu pequeñu sobre'l conceptu d'""historia"" al traviés de la figura d'un arqueólogu de la Universidá d'Uviéu que ta trabayando nel estudiu de la ilesia de Santu Adrianu de Tuñón. La segunda parte céntrase na aparición d'una inscripción nuna piedra del templu que-y dexa reflexonar sobre lo qu'asocediera nesi mesmu llugar en dómines pasaes.

Lluís Portal tien publicáu un llibru de cuentos, 'Trófimo y Radamés' (1991), la biografía del escritor 'Francisco Balbín de Villaverde' (1995), y 'Secretos de Pandenes' (2007); ye'l ganador del Premiu Uviéu de teatru nes dos ediciones convocaes hasta la fecha: 2007 (por 'Oh 36!') y 2008 (por 'Poison'), que verán la lluz el prósimu añu; la primera será llevada a les tables prosimamente por una nueva compañía dramática asturiana: Pretexto."