Podemos pide a Barbón “que llame al orde” a los senadores socialistes asturianos por refugar la partida pa l’ALLA

“El sofitu a la llingua asturiana hai qu’amosalu con fechos, non con pallabres”, asegura Lluis Miguel Orviz, responsable de Derechos Llingüísticos de Podemos, qu’afala a Adrián Barbón a llamar al orde a Vicente Álvarez Areces y María Luisa Carcedo. Dambos refugaron nel Senáu una partida pa l’ALLA de 100.000 euros.

Compromís presentara, al igual que l’añu pasáu, una enmienda nel Senáu a los Presupuestos Xenerales del Estáu aprobaos nel Congresu pa que l’Academia de la Llingua Asturiana (ALLA) recibiera una partida al igual que’l restu d’academies de les llingües del Estáu. La cantidá solicitada yera de 100.000 euros, menor inclusive que les que lleven les restantes, pero nengún de los seis senadores asturianos apoyóla nin solicitó que se votara en solitariu –fíxose en bloque– si nun taba d’alcuerdu col restu de propuestes de Compromís.

“Una vegada más, los representantes nel Senáu del PP, PSOE y Foro votaron en contra de los intereses d’Asturies”, llamenta Orviz, que recuerda que dende Podemos Asturies “siempre reivindicamos que’l Senáu ha de ser una cámara de representación territorial y non un cementeriu d’elefantes, como comprobamos esta selmana, cuando unos representantes nel so fin de ciclu políticu antepunxeron los sos intereses particulares a los intereses de les asturianes y los asturianos”. La llista de senadores asturianos ta formada por la María Luisa Carcedo (PSOE) y Fernando Goñi (PP), por designación de la Xunta Xeneral; y Mario Arias y Ovidio Sánchez (PP), Rosa Domínguez de Posada (Foro) y Vicente Álvarez Areces (PSOE), por eleiciones.

“Si bien de los representantes de Foro y del PP nada cabía esperar, esmoleznos y atristáyanos profundamente’l voto de Carcedo y d’Areces en contra d’una ayuda económica que, por cierto, reciben les academies de les llingües del restu d’España”, posicionándose asina “en contra de la llinia favoratible al asturianu que caltién l’equipu qu’encabeza Adrián Barbón”. Poro, afala al secretariu xeneral de la Federación Socialista Asturiana a “que-yos llame al orde”.