Clausuróse n’Ayande’l IX Seminariu d’Estudios Asturianos

"La mesa redonda “El paisaxe asturianu como activu de desarrollu y futuru”, punxo’l puntu esti domingu a la IX edición d’Estudios Asturianos qu’organiza añalmente la Fundación Belenos. Nesti casu La Puela d’Ayande acoyó a diferentes especielistes asturianos qu’afondaron, pente medies de conferencies y conceyos abiertos, nes problemátiques que vive’l paisaxe asturianu dende’l puntu de vista mediuambiental, cultural y social.

La mañana del sábadu entamaba cola conferencia del xeógrafu y técnicu de desarrollu local Xosé Nel Riesgo, que na so charra “Asturies, territoriu desarticuláu: desorganizaciones, desmantelamientos y desconciertos” falaba de la “crisis irreversible del modelu tradicional asturianu” que se vien produciendo de magar trenta años ensin que se llegara entovía a una “visión global” que nos diga hacia “ónde queremos caminar”. Nesti mesmu sen, y yá dende un puntu de vista más concretu, l’inxenieru de montes Alberto Fidalgo López desarrolló una esposición na que se sorrayaba’l potencial del monte asturianu como activu aconómicu d’una población que, les más de les veces, ye la propietaria llexítima del mesmu. Asina, insistió sobre la importancia de esclariar la propiedá de los montes asturianos, al tiempu que s’asesora a los vecinos de les aldees y parroquies de les soluciones sostenibles d’esplotación del monte sobre les que puen trabayar. Esti mesmu conceptu de participación de los pueblos nes decisiones que tienen que ver colos sos recursos foi tocáu na conferencia del arquitectu maliayu Xuan Pedrayes Obaya titulada “El feísmu y la movilidá sobremoderna na aldea asturiana. De la ería triste a la braña eólica”.

Na cabera de les meses redondes, na que tamién participó l’economista José Alba, foi precedida pela proyección del documental “Paraíso Industrial”, de Conchi Rodríguez y Kela Coto. Según reconoció la directora del mesmu, la primera intención yera facer un siguimientu de les midíes que taba tomando’l Gobiernu asturianu en rellación a les normatives sobre cambiu climáticu, “cuál ye la nuestra sorpresa”, afirmó la realizadora, “cuando vamos descubriendo que non sólo nun se cumplen les midíes sinón que van a duplicase les emisiones”. A partir d’esta premisa la cinta analiza la política enerxética del Principáu al traviés de les actuaciones más comprometides: les centrales de ciclu combináu, los parques eólicos, les llinies d’alta tensión, les centrales de biocombustible y la regasificadora d’El Musel. Actuaciones que, según los ponentes, van a llevase alantre a sabiendes del altu costu costu ambiental, económicu y social, nel casu de les actuaciones que lleven apareyaes un peligru directu pa la población."