La parroquia llanisca de San Roque recupera l'apellíu 'l'Acebal'

Modifícase'l topónimu pa pasar a denominase oficialmente San Roque l'Acebal.

La demanda de los vecinos d'esta parroquia de dalgo más de 300 habitantes de recuperar l'apellíu 'l'Acebal' pal pueblu foi aceptada pola Xunta Asesora de Toponimia y aprobada pol Conseyu de Gobiernu del pasáu 6 de xunu, asoleyándose ayeri nel Boletín Oficial del Principáu d'Asturies (BOPA) el decretu qu'oficializa esti cambiu. D'esta forma, San Roque l'Acebal pasa a ser el topónimu oficial d'esti nucleu poblacional.

Hasta'l 2005, cuando Llanes iguó la so toponimia pa facer oficial la tradicional, siendo'l primer conceyu en dar el pasu xunto con El Franco y Carreño, el nome de llugar utilizáu pola Alministración yera 'San Roque del Acebal'. Nesi momentu pasó a ser San Roque a seques, recuperando agora l'apellíu na so forma asturianizada.