Marisa Valle Roso, José Manuel Tejedor y Muyeres actúen na FNAC

El gaiteru da un conciertu tamién n'Uviéu.

La FNAC, tienda asitiada nel centru comercial Intu Asturias, celebra mañana la xornada 'Ni un minuto sin música' con motivu de la Fiesta Europea de la Música (21 de xunu), na que la música del país va tener un protagonismu especial. Asina, Marisa Valle Roso, José Manuel Tejedor y Muyeres van ufrir una actuación y van firmar discos.

L'actividá va comenzar a les 10 hores con dos sesiones de pinchadiscos, pa siguir a les 13 hores col gaiteru avilesín, que presenta'l so trabayu 'Miraes'. A les 16 hores va haber un taller de percusión pa neñes y neños, y a les 18 hores el turnu ye pa'l cántabru Nando Agüeros.

'País malva', de Muyeres, va ser protagonista a les 19 hores, pa zarrar la xornada Marisa Valle Roso a les 20 hores. La cantante llangreana va firmar a los sos siguidores exemplares del so discu 'Consciente'.

'Llatíos. Los ritmos del planeta'

Tejedor va llevar tamién los cantares de 'Miraes' a Uviéu'l domingu con un conciertu nel Auditoriu previstu pa les 20 hores dientro del ciclu 'Llatíos. Los ritmos del planeta'. El preciu de la entrada ye de 6 euros.