La XDLA solicita a Losa el fin de los ataques al asturianu dende Delegación del Gobiernu

La xestión de Gabino de Lorenzo al frente de la Delegación del Gobiernu estatal n’Asturies tuvo marcada pola persecución a les distintes ordenances d’asturianu aprobaes nos conceyos y la falta de respetu a la toponimia oficial. La XDLA pide a Delia Losa que finen los ataques “contra’l nuesu patrimoniu llingüísticu”.

El cambiu de color nel Executivu estatal pue trayer aire nuevos pa la situación de la llingua asturiana, coincidiendo tamién col camudamientu de criteriu con respeuto al idioma na Federación Socialista Asturiana. Ún de les primeres decisiones ye’l relevu de la persona al frente de la Delegación del Gobiernu estatal n’Asturies, onde’l popular Mariano Marín, nomáu hai menos de dos meses, va ser sustituyíu por Losa, secretaría de Política Institucional de l’Agrupación Municipal Socialista d'Uviéu.

“La Xunta pola Defensa de la Llingua Asturiana (XDLA) quier felicitar a la delegada nueva del Gobiernu n'Asturies, Delia Losa, pol so nomamientu, al empar que-y solicita que ponga fin a los ataques que dende la entidá qu'agora va encabezar s'entamaron contra'l nuestru patrimoniu llingüísticu”. En concreto, el coleutivu cívicu refierse a les denuncies feches dende Delegación con Gabino de Lorenzo como responsable a planes de normalización y ordenances aprobaes en conceyos como Carreño, Bimenes, Noreña o Llaviana.

“Foron ataques contra la llingua asturiana y contra l'autonomía de los conceyos, porque, con Gabino de Lorenzo actuando como executor de los prexuicios de dalgunos dirixentes del Partido Popular, atacóse y recurrióse xudicialmente toles midíes qu'intentaron llevar alantre los conceyos pa normalizar l'usu del nuestru idioma”, espliquen dende la XDLA, qu’espera que la socialista “siga otru camín, el del respetu a l'autonomía municipal y a la llexislación llingüística asturiana”.

Nesi sen, encamienta a la Losa a que principie “yá les xestiones necesaries pa que toles instituciones del Estáu respeten la toponimia asturiana oficial, tanto en señalizaciones como nel usu alministrativu”.