UNA considera que yera posible l'aprobación en Filoloxía de la primer propuesta d'Ana Cano sobre l'asturianu

"Unidá Nacionalista Asturiana (UNA) consideró güei que la primer propuesta de la ex decana de Filoloxía Ana Cano d'integración del asturianu col Maior de Llingües Modernes del futuru Títulu de Grau de Filoloxía, refugada na Xunta de la Facultá de xunu, podía ser aprobada'l pasáu xueves, na sesión na que s'aprobó la propuesta de Minor, formulada pol nuevu decanu, José Antonio Martínez.

Asina lo afirmó la formación al traviés d'una nota prensa a la que tuvo accesu Europa Press.

Pa UNA, el resultáu de la votación del xueves (63 votos a favor del Minor, frente a 27 a la escontra) demuestra que ""ye evidente qu'existe demanda pa una presencia más digna del asturianu, seya como Maior o na forma presentada pola ex Decana, polo que, a xulgar pol resultáu de la votación, yera posible, con voluntá negociadora per parte del Decanu y del rector, configurar una mayoría na Xunta de la Facultá que sacare alantre una propuesta más apropiada"".

La formación nacionaliega considera que la opción aprobada (un Minor de 48 creitos d'asturianu, dientro d'un titulación de 420) ""supón de fechu una degradación de les espectatives de la sociedá asturiana no que cinca a los estudios de la llingua del país"". ""Recordamos nesi sen qu'hasta la Xunta Xeneral del Principáu solicitó nel añu 2000 por unanimidá, col votu de los grupos del PSOE, IX y PP, la creación d'una titulación de grau de Filoloxía Asturiana, dalgo que queda mui lloñe cola presencia de la llingua como Minor"", esplicó.

MARXINACIÓN NA UNIVERSIDÁ

UNA considera amás que l'alderique sobre'l Minor ""ocultó la triste realidá institucional y académica de la llingua na Universidá d'Uviéu que vive nuna situaicón de marxinación y discriminación, contraria a los estatutos y la llexislación vixente, como la que sufren los alumnos que deseen facer usu de la so llingua nel so país"". El comunicáu recuerda que ""nesti mesmu momentu'l voceru d'Unidá Nacionalista Asturies, Faustino Zapico, tien parada la so carrera académica pola prohibición de realizar la so tesis doctoral n'asturianu"".

La formación fizo poro ""una llamada al Rector y a la comunidá universitaria nel so conxuntu p'asitiar la nuesa llingua nel llugar que tien de tener na nuesa universidá nel plazu de tiempu más cortu posible""."