Riopedre considera l'aprobación del Minor una "solución apropiada" y Valledor pide'l mesmu procesu pa Maxisteriu

"El conseyeru d'Educación, José Luis Iglesias Riopedre, consideró güei que'l Minor d'asturianu, aprobáu ayeri na Xunta de la Facultá de Filoloxía, ye una solución ""apropiada al pensamientu de la Universidá d'Uviéu"". Pela so parte, el diputáu na Xunta Xeneral por Izquierda Xunida-bloque por Asturies-Verdes, Francisco Javier García Valledor consideró la decisión ""mui positiva"", pero pidió un mesmu procesu pa la facultá de Maxisteriu.

Pal conseyeru ""la votación realizada ayeri muestra que la propuesta de crear un Minor d'asturianu cuenta con un apoyu mayoritariu"". Amás, apuntó que la creación del Minor ""tien de convalidase tovía na Axencia Nacional d'Evaluación de la Calidá y Acreditación (Aneca) y nel Conseyu d'Universiades"", un trámite ante'l que'l titular d'Educación declárase ""optimista"".

Pela so parte, Valledor considera ""mui positivu"" que l'asturianu tenga estudios reglaos na Universidá, ""dalgo que debería ser normal, dende hai munchu tiempu"".

Pal diputáu, ""ye necesario destacar la unidá de la inmensa mayoría de los profesores de Filoloxía que vinieron defendiendo y trabayando por algamar que la nuesa universidá dea respuesta a una demanda y una necesidá pa la sociedá asturiana, frente a aquellos que, ensin argumentos académicos y científicos, punxeron demientres munchu tiempu perdelantre los sos prexucios y los ses posiciones antiasturianistes, pa torgar esti derechu"".

Sicasí, señaló que ""resulta imprescindible que la Escuela de Maxisteriu, que forma profesoráu d'Infantil y Primaria, trate'l mesmu procesu que la Facultá de Filoloxía teniendo en cuenta que tienen qu'adautar los sos estudios pa la so entrada en vixencia nel cursu 2010-2011"".

Según Valledor, la decisión adoptada ayeri ""ye un primer pasu que tien de complementase con otros pa garantizar plenamente la mesma formación del profesoráu de 'llingua' asturiana que del restu de materies --educación física, ciencies sociales, matemátiques- na educación infantil, primaria y secundaria n'Asturies"". Tamién señaló ""imprescindible"" que nel Master que va sustituyir al actual CAP (Certificáu d'Aptitú Pedagóxica) s'incluya ""una formación específica pa los titulaos que vayan exercer como profesores d'asturianu""."