Ana Cano critica que'l decanu de Filoloxía nun recuperare la so propuesta d'estudios d'asturianu, superior al Minor

"La presidenta de l'Academia de la Llingua Asturiana, Ana Cano, y ex decana de la Facultá de Filoloxía, afirmó güei nun entender por qué'l Decanatu nun presentó a la votación de la Xunta de la Facultá d'esta mañana, la so antigua propuesta d'estudios de llingua asturiana, en llugar del Minor de 48 creitos, aprobáu a lo último.

En declaraciones a Europa Press, Cano recordó les matizaciones qu'espresó demientres la so intervención na Xunta, na que votó a favor de la propuesta d'integración d'estudios de llingua al traviés d'un Minor.

""Nun entiendo por qué'l decanu nun presentó l'anterior propuesta"", afirmó. Referíase a la plantegada pol so equipu decana a l'anterior Xunta, celebrada en xunu, y qu'incluyía la posibilidá d'estudiar asturianu, al traviés del Minor, o bien al traviés d'un bloque de 72 creitos denomináu Llingua A, ootru de 48, denomináu Llingua B, equivalente al Minor.

Esta postura foi refugada al aprobase una enmienda contraria del profesor Félxi Fernández de Castro, motivu pol que Cano presentó la so dimisión como decana. El so sustitutu nel cargu, José Antonio Martíenz, presentó güei la opción de Minor como solución al conflictu, la cual s'aprobó por 63 votos a favor, 27 a la escontra, cuatro votos en blancu.

Sin embargu, Caso tien claro que ""nun existe nenguna razón de tipu llegal"", que torgare volver presentar l'anterior propuesta y amás aseguró que na Xunta, tres la so intervención, tampoco se-y ofreció nengún argumentu que lu xustificare.

Nesti sen caltuvo, y afirma que va siguir calteniendo, que'l Minor ye ""insuficiente dafechu"" de cara a la formación de profesores de Llingua Asturiana.

""NUN SE DIO OTRA POSIBILIDÁ""

La presidenta de l'Academia xustificó'l so votu a favor del Minor en que ""nun se dio otra posibilidá"", y añadió: ""cómo voi votar a la escontra de dalgo qu'amás forma parte d'una propuesta del mio anterior equipu decanal"".

Dexó claro de la mesma manera que los estudios d'asturianu ""tienen de tar integraos na ufierta de la Facultá de Filoxía y a cargu de la mesma Facultá"", y qu'eso ha ser asina porque existe un mandatu nesti sen de la Llei d'Usu y Promoción.

Per otra parte, ante la posibilidá de que nel futuru, y en función de la demanda que tenga'l Minor, se plantegue de nuevo la posibilidá de crear un Maior, Cano mostróse pesimista. Recordó que'l Títulu Propiu (estudios de postgráu que nesti momentu s'exixen a llicenciaos en Filoloxía y diplomaos en Maxisteriu pa poder ser profesores d'asturianu) nació en 1994 como dalgos provisional, hasta que s'integraren los estudios d'asturianu dientro de los planes de Filoloxía. Hubo poro qu'esperar 14 años pa que se llograre tal integración al traviés del Minor. ""Yá vemos lo que da de sí la provisionalidá"", afirmó Cano."