L'asturianu entra como "Minor" nos planes d'estudiu de Filoloxía

"La Xunta de la Facultá de Filoloxía Asturiana aprobó güei la propuesta del decanu, José Antonio Martínez, d'inclusión del asturianu como Minor (bloque d'asignatures de 48 creitos), lo qu'inxerta a la llingua asturiana dientro de les enseñances de la Filoloxía a un nivel inferior al restu de les llingües ufiertaes.

L'alcuentru, celebráu esta mañana, tenía como oxetivu dar el preste a la propuesta de Títulos de Grau plantegada pol Decanatu, de cara a los futuros estudios de Filoloxía, tres la reforma de los estudios universitarios p'adautalos al Espaciu Européu d'Enseñances Superiores (EEES). El decanu proponía la creación de cinco títulos de grau (actuales carreres), compuestos por un Maior (120 creitos), combinable con un Minor. Ente los Minores, figura'l d'asturianu, depués de que la Xunta de Facultá refugara la propuesta de l'anterior decana, Ana Cano, d'asitiar la llingua asturiana como llingua principal dientro del títulu de Llingües Modernes.
El profesor Félix Fernández de Castro, presentara una propuesta contra la presencia del asturianu polo qu'esti puntu votóse a parte del restu del conxuntu. El resultáu foi de 63 votos contra la propuesta de Félix de Castro, 27 a favor y cuatro en blancu.
Enantes de la votación, hubo delles intervenciones n'apoyu a la propuesta del decanu, ente les que rescamplaron la de los catedráticos Antonio Vespertino Rodríguez (Llingües Romániques) y Ana Cano (ex decana y presidenta de l'Academia de la Llingua Asturiana), amás d'otros profesores, como Xulio Viejo, Juan Carlos Villaverde o Miguel Ramos Corrada. Esta presencia foi considerada como insuficiente por amplios sectores asturianistes, como la mesma ex Decana o la Xunta pola Defensa de la Llingua Asturiana, que fixo una visible campaña nos últimos díes nos que defendía la presencia del asturianu nos planes d'estudiu, al mesmu nivel que'l restu de les llingües. Pel so llau, el Seminariu de Filoloxía Asturiana, un grupu de profesores y estudiantes de la Facultá, defendió ensin reserves la propuesta de Minor del decanu. Va dellos años, la Xunta Xeneral del Principáu aprobara una declaración na que pidía que l'asturiana fuere una titulación del más altu nivel.

CINCO TITULACIONES
Pese a la so repercusión mediática, el Minor d'asturianu ye un aspeutu más dientro de la propuesta xeneral de títulos del decanu, que foi aprobada definitivamente güei, ensin nin tan siquiera sometese a votación, puesto qu'existía yá un consensu previu.
La Facultá de Filoloxía va ofrecer cinco títulos de grau: Estudios Ingleses, Llingua Española y les sos Lliteratures, Llingües y Lliteraturaes Romániques y Comparaes (que va incluyir Maiores d efrancés, italianu y portugués), Estudios Clásicos y Llingües y Lliteratures Modernes (que va incluyir los memos Maiores de Romániques, amás d'un d'alemán). La previsión ye qu'estos estudios se pongan en marcha de magar el cursu 2010-2011. Hasta entós, la propuesta ha desarrollase en dellos planes d'estudios, y aprobase n'instancies superiores, tanto autonómiques como estatales."