Ecoloxistes refugen la xestión conxunta de Picos d'Europa pol riesgu de "esmembramientu"

"Dellos colectivos ecoloxistes mostraron el so refugu al conveniu de collaboración ente les comunidaes d'Asturies, Cantabria y Castiella Lleón pa la xestión del Parque Nacional de Picos d'Europa. A xuiciu de los ecoloxistes, esa xestión nun garantiza la xestión integrada del parque, supón una cesión frente a plantegamientos que persiguen un nivel de proteición, y implica un peligru de ""esmembramientu"" del área.

Asina consta nes conclusiones de los XXIII Alcuentros pa la Defensa de los Picos d'Europa, celebraos esti fin de selmana y al qu'asistieron más de 20 representantes de les asociaciones ARCA, ANA, Coordinadora Ecoloxista d'Asturies, COA, La Cirigüeña, Ulex, Ascel, Plataforma pa la Defensa de los Picos d'Europa y Plataforma pa la Defensa del Cordal Cantábricu.

A xuiciu de los ecoloxistes l'asunción poles comunidaes autónomes de competencies esclusives na xestión de los parques nun torga si existiere voluntá política, que nos órganos de xestión recoyíos nel conveniu puea participar l'Alministración del Estáu.

Per otru llau, critiquen que la regulación recoyida pal director conservador y los codirectores ye ""incompatible"" con una xestión uniforme y ensin desequilibrios nel propiu parque. ""Va implicar modelos de criterios de xestión diferentes en cada territoriu"", señalaron. Amás, llamentaron que se conceda ""derechu de vetu"" a cada comunidá autónoma pa proyeutos que nun-yos presten.

FRAGÜESOS Y LLOBOS

Per otru llau, los ecoloxistes tamién se refirieron a la reintroducción del frangüesu y a la eliminación de llobos. Sobre'l primer asuntu, dixeron que'l plantegamientu ye ""inapropiáu"" y tien un impautu negativu hasta na zona suministradora d'exemplares, en referencia a los Pirineos.

No que cinca al llobu, los ecoloxistes exixeron tresparencia en rellación a los datos de la población en Picos d'Europa, reclamando un plan específicu pa la especie nel Parque Natural.

A lo último, los colectivos insitieron na necesidá de rebaxar la presión que sufre'l Parque Nacional, incluyida la ganadera, evitando usos agropecuarios incompatibles cola conservación, como la carga ganadera escesiva, la eliminación illegal de fauna, o la presencia de venenu."