Iberia almite la reducción de vuelos ente Asturies-Madrid en xineru y febreru por "axustes típicos en toles rutes"

"El director de Ventes d'Iberia pa España, Javier Alonso, almitió güei que la compañía aérea va amenorgar les sos conexones ente Asturies y Madrid. Alonso esplicó que'l tráficu aereu va pasar de nueve vuelos a ocho demientres los meses de xineru y febreru por ""axustes típicos en toles rutes"". ""Lo mesmo va pasar nos aeropuertos de munches ciudaes españoles"", apuntó.

Sin embargu, la compañía aérea na so páxina web caltién la reducción de vuelos nel mes de marzu del 2009 ente Asturies y Madrid. Los díes afeutaos son los miércoles y los vienres, que se recorten dos y un vuelu, caún. Nesti momentu los miércoles hai nueve conexones con Barajas y en xineru, febreru y marzu se reducen a siete, mientres que los vienres hai nesti momentu nueve conexones que se recorten a ocho.

El responsable de Ventes d'Ibera realizó estes manifestaciones demientres l'almuerzu de trabayu que se desarrolló güei nel Hotel AC Forum d'Uviéu pa presentar la programación de vuelos d'iviernu d'Iberia.

Alonso dixo qu'Iberia ""va siguir apostando por Asturies"" y consideró que con nueve vuelos ""pue considerase que'l Principáu tien un puente aereu col capital española"". Nesti sen, afirmó que la compañía aumentó nun 9,5 por cientu los asientos nos vuelos con Madrid, sobre'l branu d'Iberia.

""La terminal asturiana ye'l cuartu aeropuertu d'España con mayores conexones cola capital d'España"", apuntó Alonso, y recordó que dende Santiagu'l Monte hai nueve destinos con Air Nostrum: seis a España; dos a Europa (París y Bruseles) y una nueva llinia que va entamar en marzu a Lisboa.

Estes cifres, según Iberia, tornen nun aumentu del 12,3 por cientu en pasaxeros (432.000) y una cuota de mercáu ente Asturies y Madrid del 73 por cientu, 0,4 puntos penriba de l'algamada nel 2007. Alonso apoyó estos datos argumentando que la compañía aérea incrementó nun 40 por cientu les conexones con Europa, África y Oriente Mediu. ""Nenguna compañía conecta Asturies con tantes ciudaes, con tantes opciones y alternatives como Iberia"", dixo Alonso.

El responsable de ventes d'Iberia señaló amás que l'aerollinia ""lloñe d'aumentar les sos tarifes baxa los precios"". ""Iberia tien una ufierta de 33 euros pa volar a Madrid y amás, cada selmana ofrécense 1.750 asientos nesta ruta por menos de 62 euros"", apuntó Alonso.

Nesti sen, el director de ventes señaló tamién qu'existen ufiertes pa vuelos internacionales como la tarifa de 330 euros (ida/vuelta) pa destinos como Boston o Washington. ""Iberia conecta Asturies con unos 200 destinos del mundu, de los que 107 llégase con aviones de la propia compañía"", añadió.

A entrugues de los periodistes, sobre l'ausencia d'operaciones na terminal asturiana d'EasyJet y de Spanair, Alonso señaló que ""ellos nun echaron a naide sinón que se fueron porque nun yeren rentables"" y manifestó qu'Iberia caltién la regularidá de vuelos nel Principáu gracies a les conexones posteriores con otros destinos. ""La compañía nun podía operar si los sos vuelos se llendare de puntu a puntu"", añadió.

Pela so parte, Javier Alonso refugó como competencia directa'l ferrocarril, asina como tamién quitó importancia a los dos vuelos directos ente Asturies y París de la compañía Air France y un vuelu a Mallorca con Air Berlin, dambos con conexones a otros destinos. ""Ellos tienen dos y un vuelu diariu, caún, mientres que nós operamos con nueve y nun mos preocupa"", añadió.

ATERRIZAXE N'ASTURIES

Pela so parte, la subdirectora de Prensa y directora de Comunicación d'Iberia, Margarita Blanco, señaló que los aviones d'Iberia aterricen colos niveles I y II del ILS (Instrumental Landing System) nel aeropuertu d'Asturies.

Blanco manifestó que los pilotos, por seguridá y por decisión empresarial, nunca utilicen el nivel III de ILS especial pa situaciones d'escasa visibilidá, porque l'aeropuertu asturianu ta nuna vaguada que ""confunde al sistema operativu""."