El PP pide a Areces el cese del conseyeru de Salú pol "deterioru del sistema d'Atención Primaria"

"El Partíu Popular exixó al presidente del Principáu, Vicente Álvarez Areces, la destitución del conseyeru de Salú, Ramón Quirós, pol ""deterioru"" y ""la situación caótica"" que sufre l'Atención Primaria, a xuiciu del PP, dende que'l responsable d'esta cartera accedió al cargu.

Asina lo manifestó'l diputáu popular Carlos Galcerán, nuna rueda prensa convocada, p'analizar la situación d'esti sector del sistema de salú n'Asturies, y concretamente, l'enfrentamientu que la Conseyería caltién col sindicatu mélicu Simpa, de cara a la reforma de l'Atención Primaria.

Galcerán criticó les ""supuestas aportaciones"" de Quirós a la Primaria dende'l so nomamientu. En primer llugar refirióse a la propuesta d'implantación d'Unidaes de Xestión Clínica, enantes autónomos nos que se tornen los actuales ambulatorios. Según Galcerán, el modelu que propón el conseyeru ""fracasó nes comunidaes nes que se punxo en marcha, y de fechu nun hai nenguna comunidá autónoma que lu aplique"".

No referente a la creación de guardies, afirmó que ""les hai dende hai más de 20 años"". Según el diputáu, la diferencia ye qu'hasta agora ""les facía personal especializáu en guardies, y agora van tener que faceles trabayadores de la plantiya del centru"". En tercer llugar, afirmó que la idea d'abrir los centros en xornaes de tarde ""yá s'aplicó n'Asturies y foi un fracasu"".

Tamién señaló otros problemes existentes nel sector, ""por mor de la imposición de midíes improvisaes"". Dalgunos d'ellos son el ""surdimientu per primer vez de llistes d'espera n'Atención Primaria, y la renuncia en munchos centros de los coordinadores"".

Amás, criticó que ""nun haya collaboración de los profesionales d'Atención Primaria"", y recordó que se contó cola collaboración de ""sociedaes méliques que voluntariamente realizaron un proyeutu"", de cara a la reforma del sector. ""Al final, esti trabayu tiróse a la basoria y nun se contó con ellos"", señaló Galcerán, p'añadir que ""la tresformación del sistema debe pivotase sobre los profesionales"".

Según el diputáu, ta creándose amás ""un mal ambiente llaboral que van pagar los pacientes"".

Pal diputáu, Quirós, ""nun pue ser solución al problema porque él ye'l problema"", motivu pol qu'exixió a Areces ""el cese del conseyeru como única posibilidá d'evitar un nuevu deterioru de la Sanidá"".

El parlamentariu popular tamién anunció que'l so partíu va entrugar por esti tema demientres el próximu plenu na Xunta Xeneral, previstu pal xueves día 27, al conseyeru de Sanidá, el cual espera ""que seya otru y non Quirós"".

FUGA DE MÉLICOS

Según Galcerán, de los últimos 100 mélicos que realizaron el MIR n'Asturies, sólo unos 20 quedaron a trabayar na comunidá. Señaló asina la ""falta de fidelidá"" del Gobiernu asturianu pa con estos profesionales. ""Tamos echándolos"", afirmó. Dende'l so puntu de vista, ""había que fidelizalos al 100%"".

Recordó amás que l'añu pasáu'l PP ""pidió una proposición non de llei solicitando un estudiu de tolos mélicos qu'hai n'Asturies y cuando se diben necesitar"". ""Debió presentase na Xunta enantes del 30 de xunetu del 2008, y tovía nun se presentó"", protestó'l diputáu, señalando'l ""despreciu a la Xunta y a los profesionales per parte d'esti conseyeru""."