Antifacistes van manifestase'l sábadu en Xixón pa pidir l'absolución de los acusaos polos incidentes de Cangues d'Onís

"La Coordinadora Antifacista d'Asturies prepara pal próximu sábadu, 22 de payares, una manifestación antifacista. La convocatoria coincide, como ye habitual, cola celebración, el día 20, del trixésimu tercer aniversariu de la muerte del dictador Franciso Franco, y pretende pidir la llibertá de los 14 acusaos nos incidentes que fai tres años tuvieron llugar en Cangues d'Onís, tres cargar la Guardia Civil escontra una concentración celebrada pa torgar un actu de la organización Democracia Nacional, tachada d'ultraderechista.

La marcha va salir a les 18.30 hores de la Plaza del Humedal, en Xixón, y cuenta col apoyu d'un total de 28 organizaciones, de la izquierda política asturiana, del sector sindical y del movimientu alternativu asturianu. Trátase del segundu añu que tien llugar esta convocatoria de la Coordinadora. L'añu pasáu, l'actu tuvo llugar pocos díes dempués del asesinatu del mozu Carlos Javier Palomino, a manes d'un neonazi nel metru de Madrid.

Nesti casu, amás de la reivindicación escontra'l franquismu, el facismu y el racismu, la convocatoria pretende pidir l'absolución de los 14 acusaos polos incidentes de Cangues d'Onís, que previsiblemente van tener xuiciu en xineru. En total, la Fiscalía pide pa toos ellos 35 años de cárcel, repartíos n'ocho penes d'un añu y seis penes de cuatro años y mediu. Nestos últimos seis casos, de ser declaraos culpables y d'aceptase'l total del pidimientu, los acusaos diben ingresar en prisión.

Los fechos tuvieron llugar el 10 de setiembre del 2005, fecha pa la que la organización Democracia Nacional convocare un actu en Cangues d'Onís, n'homenaxe al rei Pelayo. Minutos enantes del actu, un grupu d'antifacistes tomaron la plaza pa tratar de torgar la celebración del mesmu, escontra'l que la Guardia Civil cargó, produciéndose a continuación una serie d'incidentes que tuvieron como resultáu'l llanzamientu de botelles y piedres, y el vuelcu de dalgunos contenedores. En total hubo 24 deteníos, de los cuales 14 van sometese a xuiciu."