Asturies.com ufre les meyores imáxenes del FIMI de Lisboa

Los Sidros y La Comedia, y los Mazcaritos d'Uviéu representaron a Asturies en Portugal. L'oxetivu de Mercedes Menéndez inmortalizó los momentos más destacaos de la cita.

El XIII Festival Internacional da Máscara Ibérica (FIMI) tornó a ser un ésitu, y Asturies foi un añu más protagonista. Los Sidros y La Comedia viaxaron per décimu añu siguíu a Lisboa dende Valdesoto pa poner una sonrisa na cara a los miles de lisboetes y visitantes que s'averen al barriu de Belém pa disfutar del eventu más importante del mundu al rodiu de les mazcaraes.

Nesta ocasión, Asturies tamién tuvo representada nel Grande Desfile da Máscara Ibérica, actu central del certame, polos Mazcaritos d'Uviéu, que debutaben na cita. Amás, la gastronomía asturiana sivió d'atractivu dientro de la Mostra das Regiões, con un llugar destacáu de los productos asturianos y presencia de les indicaciones protexíes ‘Ternera Asturiana’ y ‘Chosco de Tineo’ en Lisboa, que protagonizaron amueses de cocina.

La fotógrafa Mercedes Menéndez acudió a Lisboa y inmortalizó col so oxetivu los momentos más destacaos de los cuatro díes del FIMI. Asturies.com ufre una galería de semeyes con una esbilla de les meyores imáxenes de l'asturiana.

Semeya obra de Mercedes Menéndez.