Preséntase'l segundu númberu de la revista d'historia Erada

"Esti martes 18 de payares celébrase la presentación del segundu númberu de la Revista d'Historia Contemporánea d'Asturies ""Erada"", dedicáu en gran parte a la Guerra Civil y el franquismu. L'actu va ser a les 19.00 hores na Llibrería Asturiana Trabe d'Uviéu.

La guerra civil y la dictadura franquista ye la temática protagonista en bien de los artículos. D'esti mou los historiadores Rubén Vega y Irene Díaz escriben sobre los testimonios de la represión, mientres que Xosé Miguel Suárez fala de la incautación de la Biblioteca Popular Circulante de Castripol poles autoridaes franquistes. Asimesmo Valentín Álvarez, Nicolás Alonso y Otilia Requejo faen un repasu pela arqueoloxía de la guerra civil n'Asturies. Otru de los temes trataos ye'l de los vociadores de prensa al empiezu del sieglu XX, del que s'ocupa l'historiador Víctor Rodríguez Infiesta. A too ellos añádense, lo mesmo que nel primer númberu, reseñes de llibros a cargu de dellos autores."