Coto anuncia que nun va presentase a les primaries de Foro y dexa pasu a Moriyón

La presidenta del partíu apártase tres los apoyos a l'alcaldesa de Xixón, a la qu'anima pa que dea'l pasu de liderar la candidatura.

Cristina Coto, vocera de Foro na Xunta Xeneral y cabeza de llista nes eleiciones anteriores, nun va presentase a les primaries de Foro que van celebrase tres el branu. Anuncia esta decisión depués de que se movilizara dientro del partíu una corriente d'apoyos pa que Moriyón sía la candidata na cita coles urnes de xunu del 2019 depués que l'agrupación de Siero propunxera por motu proprio a l'alcaldesa de Xixón dende'l 2011, a la que-y siguió Somiedu, Noreña y Ayer, ente otres.

La primer edil, que nun pue volver a presentase poles normes de Foro, entovía nun se posicionó énte esta demanda de les bases. Coto anímala a presentase y destaca la pluralidá del partíu depués de dexar cayer el so malestar pol alderique públicu que s'abrió tres el pasu dau dende Siero, que considera evitable.