Llangres presenta’l so tercer discu

"Esti vienres día 21 el grupu de folk asturianu Llangres va presentar oficialmente'l so tercer trabayu discográficu. Asturies.com ufierta a los llectores un tema d’adelantu del discu, bon exemplu de lo que propón Llangres nesti cd que vien a confirmar la evolución del grupu hacia los temes cantaos con toques pop.

Llangres ye un grupu qu’adulces foi quien a algamar una estabilidá y continuidá na so carrera, daqué que nun ye xera fácil. De mano'l grupu apostó claramente per una llinia folk de corte atlánticu qu’afitaron ya nel so primer discu, “Stura” en 2002. Más alantre, ya nel 2005, espublicen un discu nuevu, “Esnalar”, nel qu'apaez una de les señes d’identidá más importantes de Llangres, l’apueste polos temes cantaos, per aciu de la incorporación a la banda de la cantante Esther Fonseca. Esta incorporación lleva a que’l grupu asuma nel so soníu dellos toques pop nos temes cantaos, averando d’esta manera’l folk de Llangres a un estilu más comercial, buscando una definición fácil.

Bon exemplu d’esto ye que nesti discu de los once temes, 7 son cantaos y 4 instrumentales. “Entá”, que ye como s’entitula, vien cola producción de Pablo Lato, técnicu de soníu de Llangres, y bona muestra del so plantegamientu musical ye’l cantar que n’Asturies.com ufiertamos, “Trece Güeyos”, tema con lletra y música de Viriu Fernández, y que se puede descargar calcando equí. Nél queda claro que la voz d’Esther empasta perbien cola calidá ya imaxinación a la hora componer y arreglar de los miembros de la banda, Dolfu Rodríguez al vigulín, Viriu Fernández col bouzouki y bodhram, Yago Prado na guitarra y arpa, y Borja Baragaño na xiblata travesera y gaita.

Aparte de la presentación oficial a la prensa, que se va facer esti vienres día 21 nel local de la SGAE n’Uviéu, Llangres ta preparando un conciertu especial nel teatru Filarmónica d’Uviéu pa primeros de xineru."