El PP critica que más de la metá de la inversión de la Sociedá Rexonal de Promoción se dedica a empreses públiques

"Los diputaos del PP na Xunta Xeneral del Principáu Alejandra Cuétara y José Agustín Cuervas-Mons criticaron güei, en rueda prensa en sede parlamentaria, que más del 50 por cientu de la inversión de la Sociedá Rexonal de Promoción (SRP) se dedica a participar y conceder creitos a empreses públiques.

En concreto apuntaron que la SRP realizó actuaciones d'inversión en 31 empreses por un importe de 53 millones d'euros. Asina, llamentaron qu'ente les empreses públiques se destinaron 29 millones d'euros, el 54 por cientu.

Cuervas-Mons dixo que se trata d'una ""llinia equivocada"" d'ayudes a les empreses, puesto que ""debía promocionase más al sector priváu, n'especial en momentos de crisis económica"", caltién.

Poro, los diputaos del PP lo calificaron de ""mala política"". Nesti sen, solicitaron que se modifiquen les llinies d'actuación de la SRP y anunciaron que'l so grupu va pidir la declaración del director de la SRP, Víctor González Marroquín.

Amás, reprocharon la ""falta de tresparencia"" de los organismos de promoción del Principáu y el hermetismu del Executivu autonómicu al ""nun facilitar tola información solicitada"" pol PP en xunetu d'esti añu.

Según indicó Cuervas-Mons, solo recibieron una ""respuesta parcial"", polo que'l PP va volver solicitar información sobre los proyeutos nos que participa o avala la SRP y los oxetivos que llograron algamar, asina como los proyeutos que nun tuvieron éxitu y les perdes qu'éstos supunxeron.

Tamién pidieron al Principáu que reduza los llargos plazos de pagu a les PYME que trabayen pal sedctor públicu. Según Cuétara, trátase d'una ""cenciella pero efeutiva recomendación"".

La diputada esplicó qu'existen delles PYME de carpintería y fontanería que recibieron de l'Alministración pagarés 'non a la orde' a 150 díes, según-ylo ficieron saber saber éstes al Grupu Popular. Nesti sen, destacó que les PYME y los autónomos asturianos ""nun puen tar cinco o seis meses ensin cobrar"", porque tienen que facer frente a munchos gastos, y más n'époques difíciles.

Asina, reclamó tresparencia na contratación pública y que se pague ""en tiempu y forma"" a les empreses que consigan les obres pa entidaes del sector públicu, puesto que de lo contrario faise ""un falcu favor pa dinamizar la economía asturiana"".

D'esta manera solicitó que polo menos s'aplique la Llei escontra los retrasos nos pagos en tola actividá del sector públicu empresarial, y ""siendo más ambiciosos"" que s'axilicen lo más posible los pagos a les PYME pa que nun sufran problemes de lliquidez."