Un grupu d'estudiantes pide nuna concentración nel Campus del Milán un Títulu de Grau d'asturianu en Filoloxía

"Un grupu d'estudiantes volvió pidir por segundu llunes siguíu un Títulu de Grau de Llingua Asturiana nes futures enseñances de filoloxía de la Universidá d'Uviéu. L'actu taba integráu nuna nueva convocatoria de paru de la Xunta Moza nes facultaes del Campus del Milán.

La xornada consistió nun paru de 15 minutos, una concentración delantre del aulariu de la Facultá de Filoloxía y una charra informativa.

Al traviés d'un comunicáu al que tuvo accesu Europa Press, la Xunta Moza volvió afirmar que ""considera irrenunciable la materialización de los alcuerdos aprobaos pola Facultá de Filoloxía y pola Universidá d'Uviéu, que yá dende l'añu 1996 vienen reclamando la puesta en marcha d'un títulu de grau de Filoloxía Asturiana"".

Según la organización, ""nun existe nenguna razón técnica qu'impida llograr esti oxetivu"". ""En nengún foru universitariu ta en cuestión la existencia de la llingua asturiana, existe profesoráu abondo pa poner en marcha la titulación y existe demanda d'estudiantes, mui penriba de la qu'hai nesti momentu na mayoría de les titulaciones de la Facultá de Filoloxía"", afirmó. De la mesma manera, añadió que ""la llexislación en materia educativa n'Asturies esixe la ufierta de l'asignatura de llingua asturiana en tolos ciclos y graos"". ""Ye la Universidá d'Uviéu la que tien que garantizar la formación del profesoráu necesario"", afirmó la Xunta.

Pa la organización, ""nun ye defendible que'l contrapesu de dellos sectores que defenden abiertamente prexuicios y criterios de corte políticu pa oponese a la presencia de la llingua asturiana na universidá condicione'l derechu a poder conocer y estudiar l'asturianu col mesmu rigor y nes mesmes condiciones nes que se puen conocer y estudiar el restu de llingües presentes na Facultá de Filoloxía de la Universidá d'Uviéu""."