Gran trunfu del Sporting en Valencia

"Un gran Sporting de Xixón algamó la victoria nel campu de Mestalla énte un Valencia qu'amosó dalgunes carencies defensives y poca creatividá nel xuegu. Los asturianos, qu'afogaron el xuegu de los valencianos con un gran trabayu físicu, desendolcaron un xuegu ordenáu defensivamente y brillante nel ataque, que dio como resultáu la victoria frente ún de los grandes de la lliga. Estos tres puntos asitien al equipu xixonés novenu na tabla con 15 puntos.

Orden defensivu, máxima presión al Valencia y una buena pegada ofensiva fueron les claves d'esti gran trunfu de los asturianos. Y ye que'l Valencia viose desbordáu dende los primeros momentos del partíu énte un Spòrting que nun daba respiru a los valencianistes., qu'amás nun anduvieron finos en defensa. Esi dominiu dio como resultáuy'l primer gol, obra de Luís Morán nun desmarque qu'acabó frente al porteru, batiéndolo per rasu axustáu al palu. El mesmo Morán pegaría un tiru al palu enantes de terminar una primera parte casique inédita pal Valencia nel aspectu ofensivu. Na segunda parte el dominiu del xuegu equilibróse, anque siempre llevo la iniciativa atacante'l Sporting salvo nos caberos vente minutos. El segundu gol llegaría nel minutu 52 tres una bicicleta de Barral nel área, superando a la defensa y a Renan pel palu cortu.

El primer gol del Valencia sería de penalti nel 69, tresformáu pol ex-sportinguista Villa. Nesi momentu'l Valencia parecía centrase nel partíu, pero l'aparente recuperación acabó depués d'un golazu de Diego Castro nel minutu 81. L'arreón final del Valencia propició el segundu gol de los de casa, obra de Mata, maquillando algo un prestosu resultáu pa los asturianos, que dieron una lección de fútbol en Mestalla.

Ficha técnica

Valencia: Renan, Miguel, Albiol, Marchena, Moretti, Albelda (Edu, m. 75), Manuel Fernández (Baraja, m.59), Joaquín, Mata, Vicente (Morientes, m.46) y Villa.

Sporting: Cuéllar, Sastre, Gerard, Neru, Canella, Luis Morán (Kike Mateo, m. 88), Diego Camacho, Michel, Diego Castro (Pedro, m.85), Bilic y Barral (Matabuena, m.76).
Goles: 0-1, m.20: Luis Morán. 0-2, m.52: Barral. 1-2, m.69: Villa, de penalti. 1-3, m.81: Diego Castro. 2-3, m.90: Mata.
Árbitru: Paradas Romero. Sacó-yos tarxetes amarielles a Neru y Barral del Sporting y a Albelda y Baraja del Valencia."