El PP piensa que'l plan de viabilidá de la rula d'Avilés nun ye competitivu y acusa a Areces de "fundir" al sector

"El PP asturianu refugó güei'l plan de viabilidá nel que ta trabayando la sociedá Nueva Rula d'Avilés SA, entidá xestora d'esta infraestructura pesquera, por entender que ""nun tien nada de viable nin competitivu"". Acusó nesti sen al presidente del Principáu, Vicente Álvarez Areces, de caltener paralizada la inversión de 19 millones d'euros que se realizó nes instalaciones, y de ""fundir"" al sector pesqueru.

Asina s'espresó'l diputáu del Partíu Popular na Xunta Xeneral del Principáu, Luis Peláez, nuna rueda prensa convocada pa criticar al Gobiernu autonómicu pola so xestión nesta materia.

El parlamentariu denunció per un llau aspeutos del plan como son, dende'l so puntu de vista, l'anunciu de la subida del canon a pagar polos pescadores pola utilización de les instalaciones, de los alquileres de los almecenes y de les tases por desembarcu de pesca. Amás, afirmó que se prevé una plantiya na nueva rula de 15 trabayadores, cuando existía ""un compromisu"" d'Areces de caltener los 40 emplegos actuales.

""Equí nun hai nada de viable, nin competitividá, nin inversiones n'I+D+i a día de güei"", reprochó'l diputáu.

""PARALIZACIÓN"" DE LA NUEVA RULA

Peláez recordó que la rula ""lleva más de dos años pesllada, y amás sigue ensin equipamientu, con un coste mínimu que nun va ser inferior a 200 millones de pesetes (1,2 millones d'euros)"". ""19 millones d'euros paralizaos demientres más de dos años, una auténtica vergoña pa toos"", añadió.

Criticó amás que se creare ""una sociedá anónima (Nueva Rula d'Avilés SA) con nueve miembros pa xestionala, onde los socialistes del Principáu d'Asturies y de l'Autoridá Portuaria tienen seis miembros, y poro, seis firmes mancomunaes, mientres que los pescadores, los qu'aporten el negociu, tán ensin poder real nuna minoría claramente marcada pola política"".

Criticó tamién el fechu de que ""el director xeneral de pesca (José Ignacio Cabrera) ye a la so vez vicepresidente de la mesma, nun se sabe si pa facer la competencia a la propia sociedá o dende la sociedá al restu de cofradíes d'Asturies"". Y, a lo último, refirióse a la mencionada creación del puestu de xerente (Ramón Álvarez Suárez), ""amigu personal del director de Pesca, que cuesta yá 80.000 euros al añu amás de los gastos correspondientes de cotizaciones y otros (100.000 euros más o menos)"".

DIFICULTÁ ECONÓMICA DEL SECTOR

El parlamentariu denunció tamién la situación de ""inviabilidá económica"" de los pescadores asturianos y acusó a Areces de ""fundir"" al sector. ""Mos avalen los datos del Sadei"", afirmó constantado un ""descensu de pesca del 8,8%"", ente agostu del 2008 y agostu del 2007. ""Si comparamos setiembre del 2007 col del 2007, la reducción de los desembarcos ye del 9,3% y si mos referimos al descensu interañal, ente'l 2008 y 2007, ye de -13,6%"", añadió.

""A estes altures, lo único que podemos dicir dende'l PP ye que'l máximu responsable d'esta situación ye Vicente Álvarez Areces, que ta fundiendo al sector pesqueru n'Asturies"", acabó'l diputáu."