Preséntase en LibrOviedo la reedición de la 'Hestoria universal de Paniceiros'

Esti sábadu 12  a les 19:00 hores la editorial Saltadera  va presentar na Plaza Trascorrales d'Uviéu, dientro de los actos de LibrOviedo 2018, la reedición correxida y aumentada de la Hestoria universal de Paniceiros.

Esta obra de Xuan Bello ye la crónica emocional d’un territoriu yá míticu, ye una metáfora del mundu. El pueblu que da nome a estos relatos tien una doble dimensión: la real, el llugarín de l’alta sierra de Tinéu que formen un puñáu de cases, y la intelectual, una potente creación que l'autor fai capital d’un territoriu lliterariu propiu.

Esta obra punxo nel mapa de la lliteratura mundial la modernidá de la lliteratura asturiana, llamando poderosamente l'atención pola maestría cola que Bello relacionaba dos mundos n'apariencia dispares: la vida cotidiana d'un pueblo agrícola y ganaderu del monte altu asturianu y la lliteratura más universal.

Xuan Bello (Paniceiros, 1965), Premiu Nacional de Lliteratura 2017, ye la voz más universal de les lletres asturianes. Poeta, narrador y traductor, empieza publicando poesía en 1982, Nel cuartu mariellu, al que siguen Llibru de les cenices (1987), Los nomes de la tierra (1991), El llibru vieyu (1994), Los caminos secretos (1997) y El llibru nuevu (2017). En 2002 aparez Historia universal de Paniceiros, la obra narrativa que-y da proxección peninsular, tres de la que vienen Los cuarteles de la memoria (2003), Meditaciones nel desiertu (2003), La nieve y otros complementos circunstanciales (2007), Al dios del llugar (2007) o Unas poucas cousas guapas (2009) ente otros títulos.

Con esta nueva edición de la exemplar Hestoria universal de Paniceiros da empiezu en Saltadera de la publicación ordenada de la obra en prosa, n’asturianu, d’esti autor, dientro de la 'Biblioteca Xuan Bello' de la colección 'Adréi'.