La 46 edición del Festival de Cine de Xixón entama la selmana que vien con 207 cintes, dalgunes subtitulaes n'asturianu

"La 46 edición del Festival Internacional de Cine de Xixón '46FICXixón', entama'l próximu xueves 20 de payares, y va averar a los espectadores 207 títulos --100 largos y 107 cortos-- de producción asturiana, nacional y internacioanl demientres nueve díes con precios ""populares"" ensin incrementu dende l'añu pasáu. Dalgunes cintes van tar subtitulaes n'asturianu, como novedá pa esti añu.

Asina, según esplicó güei en rueda prensa'l conceyal d'Educación y Cultura del Conceyu de xixón, Justo Vilabrille, el preciu por proyeición va ser de 3,5 euros, mientres que por 25 euros van poder vese diez cintes, conxelando los precios dende'l 2007, y confirmando que se trata d'un festival ""cercanu y popular"".

Amás, como novedá d'esta edición yá tán a la venta les entraes al traviés de les páxines web del festival, el Teatru Jovellanos y Caxastur, entidá que collabora col certame.

Vilabrille presentó güei les novedaes y la programación del festival en compañía del director del eventu, José Luis Cienfuegos; la directora xeneral de Promoción Cultural y Política Llingüística del Principáu, Consuelo Vega, y el director de la Obra Social y Cultural de Caxastur, José Vega.

L'edil indicó que se trata d'un eventu ""sólidu, asentáu na ciudá y de gran prestixu nacional, internacional y de la crítica"", valoráu como una manifestación cultural de primer orde qu'ofreza gran proyeición a la ciudá.

De la mesma manera, remarcó l'incrementu de públicu del festival, señalando qu'en 1995 rexistráronse 12.000 espectadores, y que l'añu pasáu algamóse la cifra de 72.000 espectadores. ""Hai un incrementu importante añu a añu"", aseguró.

Pela so parte, Consuelo Vega calificó'l certame de ""iniciativa fundamental y decisivia pal cine y la vida cultural de Xixón y Asturies"". ""Esperen díes intensos de cine que nun siempre ye fácil de ver nes sales comerciales"", valoró.

La directora xeneral remarcó la promoción que fai'l festival pa la ciudá y la comunidá, asina como l'espardimientu que fai del asturianu. Asina, apuntó qu'entamó col catálogu, continuando cola páxina web y el diariu del festival, y que nesta edición va haber dellos pases con películes sutitulaes n'asturianu. Amás, va cuidase'l cine asturianu con nueve cortos en competición y otros seis fuera de concursu, asina como dos llargos.

José Vega recordó lo importante que ye'l cine pa Caxastur qu'organiza ciclos nes sos centros asina como los cursos de cine de branu, y el certame de nuevos realizadores.

PRESENTADORES Y NOVEDAES

Pela so parte, el director del festival entamó delles de les novedaes de la edición d'esti añu, que cuenta con 21 filmes na estaya oficial, na que destaca la selección de los presentadores de les gales d'inauguración y clausura.

Estibaliz Gabilondo, l'actriz y reportera de 'Caiga quien Caiga', va conducir la gala d'inauguración, mientres que Julián López, collaborador en 'La Hora Chanante' y 'Noche Hache', xunto al humorista y presentador que collaboró en Buenafuente y tamién en 'La Hora Chanante', Raúl Cimas, van ser los encargaos de la clausura.

El festival suma una película española a la estaya oficial, anque fuera de concursu, trátase de 'Las dos vidas de Andrés Rabadán', de Ventura Durall. Amás, los cineastes Atom Egoyam y Mychael Danna van tar el sábadu 22 de payares nel Jovellanos pa ""dialogar"" colos sos siguidores y presentar la película 'Adoration'.

De la mesma manera, los cortos van contar cola so propia programación. En cuanto a los xuraos, destaca la presencia de l'actriz Malena Alterio nel xuráu internacional y Eva Hache nel Xuráu de Cortometraxes. El xuráu de documentales va tar compuestu por Elena Oroz, Darío Oliviera y Claudio Utrera, mientres que'l xuráu Fipresci, van constituyilu Ruediger Suchsland, Joan Millaret Valls y Maja Volk."