Ecoloxistes exixen responsabilidaes a l'Autoridá Portuaria pola xestión de la grafiosis nes llamares

"Los grupos ecoloxistes Grupu d'Ornitoloxía Mavea y Colectivu Ecoloxista d'Avilés pidieron que s'exian series responsabilidaes a toles actuaciones qu'orixina l'autoridá Portuaria d'Avilés, en concreto pola enfermedá de grafiosis qu'afeuta a determinaos árboles, en concreto les llameres.

Según espunxeron al traviés d'una nota prensa, a mediaos del pasáu mes de xunetu, el Grupu d'Ornitoloxía Mavea yá denunció públicamente que nel paséu de la ría d'Avilés había cuatro llameres mui afeutaes pola grafiosis, una yá muerta y les otres finando. Añadieron que fai dos selmanes que l'Autoridá Portuaria se decidió a tratalo, tardando tres meses y mediu en facelo, lo que constitúi una ""grave neglixencia"".

Los ecoloxistes aseguren qu'a nivel internacional existen claros protocolos de cómo actuar nel casu de l'apaición de la grafiosis, que ye una grave enfermedá y qu'acabó cola mayoría de les llameres europees. N'Avilés, el Serviciu de Parques y Xardines del Ayuntamientu va coordinase continuamente col Ministeriu pa tentar d'atayar esta enfermedá, ""pero nun pudieron actuar nel paséu de la ría, puesto que nun ye de la so competencia y nun se pidió nin apoyu"".

""Por culpa de la neglixencia de l'Autoridá Portuaria, demientres munchos meses tuvieron vectores de la enfermedá espardiendo'l mofu per tola comarca"", llamentaron los ecoloxistes, que dixeron que talando los árboles déxense los tucos, que son un importante ñeru de la enfermedá. ""Estos raigaños tienen que sacalos con una escavadora y quemalos darréu, pa torgar que sigan tresmitiendo'l mofu"", señalaron."