Delles asociaciones de Turón denuncien el "abandonu" que sufre'l valle y anuncien movilizaciones

"Un total de 22 asociaciones de Turón uniéronse pa exixir compromisos claros con esta zona per parte de les alministraciones y anunciaron l'entamu d'una campaña informativa y de movilizacioón ante ""l'abandonu"" que, na so opinión, sufre'l valle. En concreto, el movimientu asociativu turonés ta repartiendo estos díes un trípticu informativu nel que se denuncia ente otres cuestiones, la situación que sufren dalgunos proyeutos importantes pa esta población.

Ye'l casu, por exemplu, del proyeutu Turón Centro, que, según los representantes vecinales, ye una actuación ""condenada al fracasu, escasa pa los turonenses y les sos necesidaes"", o del polideportivu que, ""con goteres, filtraciones y espaciu escasu"", fai evidente ""la necesidá de construyir un nuevu equipamientu"".

Los retrasos nel plan pa poner en valor les instalaciones del pozu mineru de Santa Bárbara o l'abandonu al que ta sometida la zona alta del valle, incluyida dientro de la figura de proteición del Paisaxe Protexíu de les Cuenques Mineres, son otros de los puntos criticaos polos vecinos al traviés d'esta campaña informativa na que tamién se trata'l polémicu tema de los fondos mineros.

Nesti sen, les asociaciones turoneses llamenten que ""a Turón correspuénde-y nel 2008 una partida d'un millón d'euros cuando sobre la mesa de la última negociación existíen casi 108 millones"", cuando señalen ""nun hai un llugar n'Asturies onde diba ser más necesaria y merecida una mayor inversión qu'equí"".

Ante esta situación, y lo que consideren ""la incompetencia total y desidia dafechu per parte del Ayuntamientu de Mieres"", el movimientu asociativu de Turón dio un pasu al frente y yá anunció una primer movilización. Va ser el próximu sábadu a les doce del mediudía nel parque de Turón, onde va tener llugar una concentración de vecinos, hosteleros y asociaciones.

Sicasí, los representantes vecinales del valle dexaron claro que tán dispuestos a dir más p'allá nes sos protestes polo que nun se descarten nueves iniciatives dirixíes a poner enriba la mesa los problemes d'esta zona."