Bloquiada la llei que diba axilizar los cambios nel Gobiernu autonómicu, tres l'astención del PP

"La propuesta de la Mesa de la Xunta Xeneral del Principáu d'Asturies (XXPA) de tramitación directa y en llectura única del Proyeutu de Llei del Principáu d'Asturies de segunda modificación de la Llei del Principáu d'Organización de l'Alministración, nun salió gúei alantre nel Plenu, pola astención del Grupu Popular. Quedaba asina frenada la propuesta, destinada a que'l presidente del Gobiernu del Principáu, Vicente Álvarez Areces, pudiere modificar la estructura ensin que tenga qu'aprobase pola Cámara.

El trámite de la iniciativa requería mayoría de dos tercios, pero los 15 diputaos del PP decidieron astenese. Sí votaron a favor el PSOE y IX-BA-Verdes, sumando 24 votos, cuando se necesitaben 30. Quedaba asina refugada la propuesta de llectura única, y poro, el proyeutu de llei va siguir la tramitación ordinaria con tramitación d'urxencia, tal y como acordó la Mesa.

D'esta manera, nun se pudo tratar el segundu de los puntos del orde del día, el relativu al alderique y votación correspondiente a la citada modificación, plantegada p'axilizar los trámites de formación de la nueva estructura de Gobiernu, frutu del pautu políticu ente PSOE y IX-BA-Verdes.

Tres la votación, el voceru axuntu del PP, Joaquín Aréstegui solicitó un turnu pa esplicar el votu y dixo que nun se-y pue pidir al PP que seya 'majete' y que vote a favor de la iniciativa mientres dende les files socialistes y d'IX se lu ta ""insultando"" al traviés de los medios de comunicación.

Dixo que'l nuevu Executivu va ser ""un gobiernu escontra'l PP"" y refugó que los culpen agora de nun aprobar la llei, caundo tanto PSOE como IX tuvieron meses abondo pa sacala alantre. Asina, señaló que la culpa de que la llei nun saliere alantre nun ye del PP, sinón de los que nun plantegaron la iniciativa na Cámara con tiempu bastante.

Sin embargu, el voceru del PSOE, Fernando Lastra, calificó de ""patétiques"" les esplicaciones del PP. Acusó a Aréstegui de nun cumplir lo acordao na Mesa de la Cámara. ""Nin siquier fueron quién a cumplir con un acuerdu"", señaló.

Lastra refirióse al PP como un ""desastre políticu"" y señaló que'l Gobiernu pautáu ente socialistes y IX-BA-Verdes va salir alantre, en dos o tres selmanes, a pesar de la votación de güei.

Pela so parte, el voceru d'IX-BA-Verdes dixo qu'Asturies necesita, nel actual escenariu, un Gobiernu estable y con una estructura eficaz. Llamentó la ""irresponsabilidá"" del PP, al que calificó d'una ""torga"" y un ""problema"" pa los asturianos."