El PP pide que los altos cargos a los que se-yos subió'l sueldu "illegalmente" devuelvan el dineru y se supriman puestos

"El grupu parlamentariu del PP na Xunta Xenral del Principáu va pidir la devolución de les subíes de sueldos a los altos cargos del Principáu a los que s'incrementaron los salarios de manera ""irregular, illegal y inmoral"". De la mesma manera, los populares van pidir una reducción y eliminación d'altos cargos y una reestructuración de este ""sector públicu empresarial"" en rellación a les sociedades y fundaciones públiques del Principáu.

Asina lo espunxeron güei en rueda prensa los diputaos del PP, Ramón García Cañal y Alejandra Cuétara, que tacharon de 'trileru' al Gobiernu autonómicu por dicir una cosa y ""facer la contraria"". Nesti sen refiriéronse concretamente a los anuncios d'austeridá nel gastu realizaos pol Executivu asturianu y la subida de 5.000 euros aprobada pa esti añu pa los directores xenerales y secretarios técnicos.

El PP insistió nes sos acusaciones sobre'l ""descomanáu"" gastu del Principáu en personal. Según el PP, el gastu d'esti capítulu aumentó nun 73,7 por cientu ente los años 2001 y 2007 y caltién que'l númberu d'altos cargos nel 2008 sobre'l 2007 creció un ""33,7 por cientu sobre'l Gobiernu anterior"". ""El personal de gabinete pasó de 64 persones a 105, lo que supón un incrementu del 54 por cientu"", dixo Cañal que denunció tamién los ""sueldos a la carta"" de personal del Sespa.

Pal dirixiente popular ""ye falso dafechu que la estructura del nuevu gobiernu que se formó de magar el 2007 se caltuviere nun nivel d'altos cargos asemeyáu al Gobiernu anterior"".

Sobre'l nuevu Gobiernu de coalición PSOE-IX, el PP dixo tener mieu de que cola política de ""defensa de les families socialistes"" haya un nuevu incrementu de personal na Alministración o nel ""entramáu de chiringuitos"" pa ""recolocar"" a los cargos socialistes que deberán abandonar les conseyeríes de Bienestar Social y Mediu Ambiente y Desarrollu Rural.

N'opinión de Cañal, l'austeridá ""ye una mentira igual que la coxelación de sueldos"". Mencionó concretamente'l sueldu del director artísticu del teatru de La Llaboral, que va cobrar 134.000 euros por once meses de trabayu"" o la subida de 5.000 euros a los directores xenerales y asimilaos ""pa compensar los sos sueldos sobre funcionarios o personal de la sanidá"".

Poro, Cañal entiende qu'esto ye ""una aición dempués de les mentires repetíes propies de trileros y desvergonzaos"". ""Nun sólo ye inmoral que se diga que se va facer lo contrario, sinón qu'amás de toes estes cuestiones ye illegal porque les perceiciones y los salarios de los altos cargos tán establecíos pola Llei de presupuestos del Principáu"".

Pela so parte, la diputada Alejandra Cuétara aludió a los ""chiringuitos"" del Gobiernu asturianu en rellación a les fundaciones y sociedaes públiques y criticó la propuesta de la Federación Socialista Asturiana (FSA) de crear un observatoriu pa evaluar la afeición de la crisis económica.

""Hai que tener poca vergoña y ser hipócrita diciendo que van crear un obersvatoriu les mesmes persones que consienten y alienden el pagu de factures a señores por 134.000 euros"", espunxo Cuétara.

De la mesma manera, recomendó a la FSA y al Gobiernu asturianu qu'en vez de constituyir el citáu observatoriu, se pongan en contautu con Cáritas pa ""entrugar cuántes families vense obligaes a dir a los comedores sociales, echen una güeyada a les llistes de paraos o se dean una vuelta y entren en cualquier comerciu o taller pa ver cómo lo tán pasando"".

Poro, Cuétara insistió na voluntá del PP de proponer que se ""recupere la llegalidá en materia de sueldos pa tener credibilidá dando exemplu"" y una reducción d'altos cargos. ""Hai qu'amenorgar y eliminar porque vamos necesitar dineru pa da-ylu al que lo necesita verdaderamente que son los autónomos y les empreses"", afirmó.

Cañal acabó diciendo que les sociedaes y fundaciones públiques tán tornando en ""chiringuitos pa recolocar a los amiguinos que salen de los Ayuntamientos o d'otros sitios"".

""COMPLEMENTOS""

Pela so parte, la conseyera d'Alministraciones Públiques y Vocera del Gobiernu, Ana Rosa Migoya, negó güei que'l Principáu subiere'l sueldu a los directores xenerales en 5.000 euros. Esplicó que lo que se fizo ye un ""complementu de productividá"" por esa cantidá, tanto a directores xenerales como a secretarios téunicos del Principáu d'Asturies pal 2008.

Señaló que l'oxetivu d'esi complementu de productivdá ye compensar la perda d'eses persones, que na so mayoría tienen condición d'emplegaos públicos, y nun accedieron a la cantidá derivada de la carrera profesional nos años 2007 y 2008.

Nesti sen, apuntó que los sueldos de directores xenerales tán igualaos a los del Estáu. Sin embargu, dixo que'l Principáu tien ""derechu"" a organizar el complementu qu'estime oportunu.

De fechu, l'aplicación d'esi complementu de productividá de 5.000 euros añales afeutó a 68 directores xenerales y secretarios xenerañes téunicos. El 66% de los mesmos son emplegaos públicos y diben tener derechu a cobrar la carrera profesional. ""Nun hai subida de salariu, hai complementu de productividá pa evitar que se dieren casos nos que les retribuciones de persones de niveles inferiores fueren mayores"", afirmó Migoya. La midida supón, poro, 340.000 euros. Añadió que los salarios de los altos cargos sigan ""conxelaos"" nel 2009."