L'IPC d'Asturies aumentó cuatro décimes n'ochobre y la tasa interañal elévase al 3,8%

L'Índiz de Precios de Consumu (IPC) aumentó n'Asturies un 0,4 por cientu n'ochobre sobre'l mes anterior, una décima más que l'incrementu esperimentáu nel conxuntu d'España (+0,3%), mientres que la tasa interañal elévase hasta'l 3,8 por cientu, dos décimes penriba de la media nacional.

Según los datos espardíos güei pol Institutu Nacional d'Estadística (INE), y recoyíos por Europa Press, nos diez primeros meses del añu l'IPC acumula un aumentu na rexón del 2,3 por cientu, frente al 2,4 por cientu del país.

La subida en dos décimes de la inflación mensual n'ochobre debióse fundamentalmente al alza de los precios de vistíu y calzáu (+10,2% n'Asturies y +9,2 n'España), que recueye'l comportamientu de la nueva temporada d'iviernu.

Tamién subieron los precios de la enseñanza (+3,4% na rexón y +2,7% nel conxuntu del país), especialmente na enseñanza n'ASturies, mientres que los precios na vivienda y melecina caltuviéronse invariables.

Pela so parte, rexistraron una tasa de variación mensual negativa'l tresporte (-2,5% n'Asturies y -2,5% n'España), pola baxada de carburantes y llubricantes; alimentos y bebíes non alcohóliques (-0,3% na rexón y -0,1% nel país), que l'INE achaca a la baxada de los precios del pescáu frescu y la carne d'ave; ociu y cultura (-0,7% a nivel rexonal y estatal), pola variación de los precios del viaxe organizáu; y hoteles, cafés y restaurantes (-0,5% n'Asturies y 0,2 n'España), pola baxada de precios d'hoteles y otros alloñamientos.

TASAS INTERAÑALES

Nos últimos doce meses, les principales repercusiones sobre la inflación rexistráronse na vivienda (+8,1%, n'Asturies y +7,4% n'España). Sicasí, la tasa nacional baxó cinco décimes, pola baxada del preciu del gasoleu pa calefacción.

Pela so parte, el tresprote rexistra un incrementu del 3,8 por cientu na rexón y del 4,2 por cientu nel conxuntu del país, tasa ésta última tres puntos inferior a la del mes pasáu, que tamién s'esplica pola reducción del preciu de los llubricantes y carburantes en comparanza cola subida qu'esperimentaron nel 2007.

N'Asturies tamién subieron los precios de productos domésticos (+3,7%), hoteles, cafés y restaurantes (+5,3%); bebíes alcohóliques y tabacu (+3,9%); y alimentos y bebíes non alcohóliques (+4,3%). La tasa d'esti últimu grupu asítiase n'España nel 4 por cientu, lo que supón una baxada en más de dos puntos en comparanza col mes anterior. Ello débese a la estabilidá que tuvieron los precios de gran parte de los alimentos n'ochobre en comparanza col 2007 como, por exemplu, la lleche y otros productos derivaos, el pan, la carne d'ave, los quesos, el pescáu frescu y los aceites.

Na rexón, nos últimos doce meses tamién presenten tasa positiva anque en menor midida la enseñanza (+4,8%), ociu y cultura (0,1%), melecina (0,6%) y vistíu y calzáu (0,5%).