Convocaes concentraciones en respuesta a la sentencia contra los miembros de l'autonomada 'Manada'

Los maxistraos condénenlos por abusu sexual, pero no por violación.

El fallu de la sentencia lleída de manera pública esta mañana pol tribunal que xulgó la denuncia por agresión sexual en grupu puesta por una moza madrilana de 18 años a los sevillanos José Angel Prenda, Ángel Boza, Jesús Escudero, Alfonso Jesús Cabezuelo y Antonio Manuel Guerrero mientres les fiestes de San Fermín, n'Iruña, del 2016 decreta que nun hebo violación, sinón abusu sexual, al entender que nun se produxo nin intimidación nin violencia. Esto fai que'l pidimientu d'ente 22 y 24 años de cárcel de la Fiscalía y l'acusación particular quede menguada a 9.

Inclusive, ún de los trés xueces, Ricardo Javier González, pidía l'absolución de los acusaos al enteder que les rellaiciones yeren consentíes. Poro, presentó un votu particular desmarcándose del veredictu.

La sentencia y l'actitú d'esti maxistráu ta provocando munches crítiques pol mensaxe que llanza respeuto a les violaciones y el tratu a la muyer, y tán convocándose concentraciones pa protestar contra la decisión xudicial. Éstes van celebrase a les 20 hores en Xixón (El Parchís), Uviéu (Escandalera) y Avilés (El Parche).

ACTUALIZACIÓN: Tamién hai convocaes concentraciones en Llangréu (17.30 hores, Casa Conceyu), Mieres (18 hores, Casa Conceyu), Sotrondio (19 hores) y, a les 20 hores nes cases conceyu de Siero, Llaviana, Castrillón, Ribeseya, Llanes y Piloña, y na plaza'l Mercáu de La Felguera.