Zapatero, convencíu de que la oficialidá va ser una realidá "na llexislatura próxima"

L'ex presidente del Gobiernu estatal sofita n'Uviéu'l reconocimientu del asturianu.

José Luis Rodríguez Zapatero viaxó al país pa recoyer el XX Premiu Purificación Tomás, correspondiente al añu 2016, col que l'Agrupación Municipal Socialista d'Uviéu reconoz a les persones físiques o xurídiques, asociaciones, fundaciones, organizaciones non gubernamentales, empreses o cualquier otra entidá o coleutivu que destacaren pola so contribución a favor de la consecución de la igualdá real ente muyeres y homes, de manera prioritaria nel ámbitu d'Asturies. El políticu lleonés tuvo tres la so intervención na Casa'l Pueblu pallabres hacia la situación de la llingua asturiana asegurando qu'esiste una "mayoría creciente" a favor de la oficialidá.

Por ello considera que va ser una realidá "na llexislatura próxima", asegurando que'l reconocimientu d'un idioma y una cultura ye compatible con tener "una visión abierta". D'esta forma Zapatero sigue la mesma llinia que los actuales dirixentes de la Federación Socialista Asturiana (FSA) o de Pedro Sánchez, secretariu xeneral del PSOE, y Adriana Lastra, vicesecretaria xeneral del partíu, con un sofitu a la proteición del idioma y de los derechos de los falantes d'asturianu y gallego-asturiano al traviés de la declaración d'oficialidá n'Asturies d'estes llingües xunto col castellanu.

Na semeya, Rodríguez Zapatero (a la derecha) posa col gallardón en compañía del secretariu xeneral de la FSA, Adrián Barbón. Tamién apaecen na imaxe Iván Piñuela, secretariu xeneral de l'Agrupación Municipal Socialista d'Uvieú, y Irma Casares, secretaria llocal d'Igualdá, Derechos y Llibertaes.