El Principáu prepara un nuevu Plan de Salú Mental p'Asturies "en consonancia" col estratexa estatal

"El conseyeru de Salú y Servicios Sanitarios del Principáu, Ramón Quirós, anunció güei que'l Gobiernu asturianu prepara un nuevu Plan de Salú Mental p'Asturies ""en consonancia"" cola estratexa estatal.

""Asturies tien una trayeutoria notable y se trabayó muncho nes últimes décades y tamos nun momentu importante revisando les actuaciones de los últimos años y plantegándomos un nuevu Plan de Salú Mental y una estratexa nesti ámbitu en consonancia cola ellaborada pol Gobiernu del Estáu"", dixo Quirós demientres la so asistencia a los actos d'Inauguración de la Nueva Área de Psiquiatría de la Universidá d'Uviéu nel Marcu del Día Mundial de la Ciencia pa la Paz y el Desarrollu.

Con esti nuevu modelu, l'Executivu va puxar por facilitar la vida autónoma na comunidá, lo qu'exixe contar con equipos que trabayen directamente cola comunidá, un siguimientu mui activu de los pacientes, una atención especial a los pacientes con trestornos mentales severos y estancies de respiru pa les families.

""La llinia que ta siguiéndose ye la correcta y tán evaluándose les necesideaes pa tratar de qu'esi plan nun seya un documentu sinón un acuerdu social y políticu que permita siguir desarrollando los servicios de Salú Mental n'Asturies"", esplicó Quirós.

Nesti sen, el conseyeru calificó de ""bona noticia"" el desarrollu del Ciber de Salú Mental nel que participa activamente l'equipu investigador de la Universidá d'Uviéu dirixíu pol catedráticu de Psiquiatría, Julio Bobes. De la mesma manera, Quirós resaltó que l'equipu asturianu integróse nuna nueva forma d'investigar ""en rede"".

""Nesti momentu nun se concibe l'investigador aisláu, sinón como grandes redes collaboratives ente investigadores que trabayen dende lloñe físicamente, pero comparten proyeutos. Eso significa acelerar la capacidá de producción científica y la capacidá d'innovación"", apuntó resaltando la trescendencia de los Ciber como andeches de grupos d'investigación.

Asina, Ramón Quirós señaló que dende'l Principáu tán interesaos en qu'haya participación asturiana n'otros Ciber. En cuanto al de Salú Mental, indicó que'l Gobiernu asturianu collabora al traviés d'un conveniu pa que la investigación pue desarrollase en tola rede de Salú Mental de la comunidá. ""Hai que trabayar xuntos en proyeutos que son d'interés pa toos"", aseguró.

Pela so parte, el catedráticu de Psiquiatría de la Universidá d'Uviéu, Julio Boes, destacó que'l so equipu pasó ""del proyeutu a la realidá"" tres once meses de trabayu, al entamar el proyeutu a mediaos d'avientu del 2007. Agora, amás, la nueva Área de Psiquiatría de la Universidá d'Uviéu refuerza l'actividá del grupu inestigador.

""Nesti añu algamamos ayudes de refuerzu a les llinies d'investigación y hasta permitieron abrir nueves llinies nel ámbitu européu, una de psicoxeriatría, otres de prevención del suicidiu, y una tercera rellacionada coles manifestaciones iniciales de la psicosis nos adolescentes"", indicó Bobes.

Asina, nesti momentu l'equipu asturianu ta reforzando les sos investigaciones en población mayor, trestornos mentales graves na adolescencia y nes yá tradicionales de prevención de suicidiu y promoción de salú mental nos adolescentes.

""Tamos mui contentos porque en pocu tiempu mos coordinamos mui bien colos investigadores básicos qu'ayudaron a que'l proyeutu avance rápidamente"", esplicó.

Nesti momentu participen 27 investigadores nel Ciber dende Asturies --ente les árees de Psiquiatría, Psicoloxía y Enfermería-- duplicando al personal qu'entamó'l proyeutu. ""Pero hai más, vino un profesor visitante de la Universidá de Dublín, Paul Corcoran, qu'investiga la llinia de prevención de suicidios y ta suponiendo un gran refuerzu"", remarcó Julio Bobes.

Pal catedráticu de Psiquiatría, lo importante agora ye ""que tola xente que s'unvió a otros países o comunidaes autónomes o formase, tornen a Asturies pa poner dalgunes llinies en marcha que tán pendientes de rotación de personal"".

Y ye que diz que nun-yos pue dir meyor. ""Nesti últimu añu 2008 algamamos les mesmes publicaciones en revistes especializaes internacionales y el mesmu grau d'impautu qu'enantes algamábemos en diez, polo que la nuesa efeutividá ye diez veces superior a lo que lo foi nel pasáu"", afirmó. Poro, calcó en que tienen ""un retu mui importante"" ante ellos, anque diz qu'asumen el desafíu ""con muncha entereza"".

El Ciber de Salú Mental compónenlu otros 25 grupos investigadores destacaos del panorama nacional, con reconocencia internacional asitiaos en Cataluña, Andalucía, Madrid, País Vascu, Comunidá Valenciana, Cantabria y Asturies.

Asina, estos investigadores trabayen andechando sinerxes pa posicionar y caltener a España en niveles d'escelencia y competencia nel marcu européu y internacional. Nel 2011 los grupos van sometese a evaluación pa ver la so eficiencia, de manera que dalgunos van poder dexar esti proyeutu o incorporase otros nuevos.

Les llinies centrales d'investigación del Ciber son los trestornos mentales graves, como esquizofrenia, trestorno bipolar, y depresiones monopolares. De la mesma manera, la metá de los grupos constituyentes trabayen n'investigación básica con animales, mientres la otra metá --na que ta'l grupu asturianu-- ta especializada na investigación clínica."