El Racing acabó cola racha de trunfos del Sporting

"Un Sporting más lentu y gris de lo habitual perdió depués de cuatro xornaes siguíes ganando. Un gol en propia puerta de Camacho permitió al Racing de Santander algamar el so primer trunfu n'El Sardinero esta temporada. D'esti mou los xixoneses queden decimocuartos na clasificación con 12 puntos. A la mala suerte xuntáronse un xuegu más gris y menos contudente n'ataque que nos partíos anteriores, lo que dio como resultáu esta derrota.

Sicasí'l partíu emprincipió mui igualáu, con dambos equipos buscando la portería contraria y bien posicionaos, anque tamién llevando mui poco peligru a les respectives arees. El primer avisu llegó per parte de los asturianos con un tiru rasu de Kike Mateo que salió axustáu al palu. La réplica cántabra llegó pocos minutos depúes, con un tiru de cabeza de Marcano que pegó nel largueru. Na segunda parte'l partíu siguió pel mesmo camín, con dos equipos que buscaben el gol con mas corazón que cabeza. A la fin foi nuna xugada desafortundada cuando llegó'l gol del Racing. Nel minutu 57 Tchité dispara al borde del área, el balón golpea na cabeza del sportinguista Camacho, disviando la trayectoria y acabando dientro de la rede énte un Cuellar que nada pudo facer pa evitalo.

Con too y con ello, los asturianos tendríen la oportunidá d'empatar nel últimu minutu, nun tiru de Barral nel área nel que'l porteru racingista evitó nuna intervención mui meritoria el gol del Sporting. Asina finó un partíu que bien pudo terminar n'empate viendo los méritos que fixeron dambos equipos nel campu de xuegu.

Ficha técnica:
Racing: Toño, Pinillos, C. Navas, Marcano (35'), Sepsi, Munitis, Colsa, Lacen, Serrano (46'), Tchité, Pereira (83'), Varela (83'), Juanjo (46'), Oriol (35').

Sporting: Cuéllar, Sastre, Gerard, Neru, Canella, Morán (56'), Matabuena (67'), Camacho, Castro, K. Mateo (72'), Bilic, Omar (72'), Michel (67'), Barral (56'). Gol: 1-0 (57'): Camacho (p.p.).

Árbitru: Megía Dávila. Sacó-yos tarxetes amarielles a Colsa (36'), Canella (46'), Lacen (65'), Neru (71'), Pereira (74') y Juanjo (36')."