El gobiernu asturianu entama’l I Día de les Ciencies Asturianes

"El Gobiernu asturianu entama’l llunes el primer Día de les Ciencies Asturianes, al empar que celebración de la xornada de la Ciencia pa la Paz y el Desarrollu, declarada pola UNESCO Esti Día de les Ciencies Asturianes va tar dedicáu a les matemátiques na figura d’un gran científicu asturianu, el matemáticu Agustín Bernardo de Pedrayes y Foyo (1744-1815).

La Directora Xeneral de Promoción Cultural y Política Llingüística, Consuelo Vega Díaz, presentó esta selmana los actos programaos pola Conseyería de Cultura y pa conmemorar el Día de la Ciencia. La xornada va tar dedicada al matemáticu asturianu Agustín Bernardo de Pedrayes y Foyo (1744-1815). Pedrayes fixo la propuesta qu’orixinó’l nacimientu del metru como unidá de medida y realizó importantes contribuciones n’estremaes estayes de la matemática. Pa conocer la so importancia Pablo Suárez, de la Universidá Politécnica de Madrid, va dar la charra “Un matemáticu asturianu del sieglu XVIII: Agustín Bernaro de Pedrayes y Foyo” a les 12:30 hores na Biblioteca d’Asturies “Ramón Pérez de Ayala”.

Sicasí va haber otres actividaes. D’una parte va tar la esposición “La ciencia asturiana”, que podrá visitase na Biblioteca d’Asturies “Ramón Pérez de Ayala” ente’l 10 de payares y el 1 d’avientu, y na que se repasa la historia de la ciencia y l’impactu científicu-tecnolóxicu na sociedá. L’amuesa tamién presentará a los homes y muyeres de ciencia más importantes na historia d’Asturies. Per otru llau van editase un llibru tituláu “Un científicu asturianu del sieglu XVIII”: Agustín Bernardo de Pedrayes y Foyo” y un cuadernu didácticu col nome de “Matemáticu Pedrayes”, con una tirada de 30.000 exemplares y que van repartirse nos centros escolares y biblioteces del país. El cuadernu pretende ser una ferramienta de sofitu pa les materies de Matemátiques y Llingua Asturiana."