La Fundación Belenos presenta’l programa del IX Seminariu d’Estudios Asturianos

"Baxó’l titulu “El paisaxe asturianu: evolución y tresformación d’un padremuñu cultural” los díes 22 y 23 de payares cellebraráse na Puela d’Ayande’l Seminariu d’Estudios Asturianos de la Fundación Belenos, qu’algama la so novena edición. Nesta ocasión ye’l paisaxe asturianu l’elementu de reflexón. El plazu d’inscripción va tar abiertu hasta’l 16 de payares.

Nesti seminariu va analizase’l paisaxe asturianu como’l “resultaú d’un procesu hestóricu singular”, amás “calcaráse nel so valir como activu económicu y de desarrollu y tamién na so vulnerabilidá ente agresiones y polítiques que nun algamen la perspectiva afayadiza, nin comtemplen la potencialidá global del territoriu”. Pa ello esti seminariu va cuntar con especialistes en cauna de les estayes escoyíes “pa dar una visión de conxuntu de la cuestión”.

Les actividaes del Seminariu entamen’l 22 de payares a les 9.30 hores, con un almuerzu. A les 10,00 h. va celebrase l’acoyida de los participantes y entrega de material y de siguío facer la presentación del Seminariu y actu d’inauguración. A les 11, Xosé Nel Riesgo, xeógrafu y técnicu el desarrollu llocal va dar llectura a la conferencia “Asturies, territoriu desartiticuláu: desorganizaciones, desmantelamientos, desconciertos”. A les 13.00 hores Alberto Fidalgo López, Inxenieru de montes, va esponer “El monte asturianu: de los usos tradicionales a los abusos d’anguaño”. Yá pela tarde a les 16.30 h. l’arquitectu Xuan Pedrayes Obaya va falar d’“El feismu y la movilidá sobremoderna na aldea asturiana”. A les 18.30 José Alba, economista de la Universidá d’Uviéu va dar una conferencia: “El valir económiu del paisaxe asturianu. Les infraestructures ya’l so impactu nel territoriu ”. La primer nuecha va pesllase con un Filandón y “Fiesta asturiana de nueite” nel Café Centro de La Puela en collaboración cola Banda de Gaites el Rapigueiro y la Xunta pola Defensa de la L.lingua Asturiana no Suroccidente.

La segunda y última xornada entama a les 10.30 hores cola proyección del documental “Paraiso Industrial”, de Conchi Rodríguez y Kela Coto. Darréu Ignaciu Llope va moderar la mesa redonda de pieslle: “El paisaxe asturianu como activu de desarrollu y futuru”, onde van participar Enrique Álvarez de Turiso de SOS Cuideiru, Txomin Goñi Tirapu, presidente de l’Agrupación de Colectivos Asturianos (ACA), José Alba, economista, Xuan Pedrayes, arquitectu, Conchi Rodríguez, directora de cine y Xosé Nel Riesgo, xeógrafu y miembru de la Fundación Belenos.

Hai 40 places disponibles y el preciu ye de 40 euros."