La Xunta Moza convoca un paru "simbólicu" de 15 minutos na Facultá de Filoloxía pa pidir el Títulu de Grau d'asturianu

"La organización Xunta Moza, integrada na Xunta pola Defensa de la Llingua Asturiana, convocó pal próximu llunes, 10 de payares, un paru simbólicu de 15 minutos, ""como siguiente pasu na so campaña reivindicativa pola inclusión del asturianu nos planes d'estudios universitarios como títulu de grau"".

Asina lo anunció la organización al traviés d'una nota prensa, pa recordar tamién que sigue la so riestra d'actividaes reivindicatives ""con una mesa informativa, pegaes de cartelos, repartu de dípticos nos campus universitarios y l'engalanamientu del aulariu del campus de Milán con banderes d'Asturies"".

""Los estudiantes del Campus del Milán tán convocaos a secundar un paru simbólicu que va facese'l llunes 10 de payares a les 12.00 hores y que va tener una duración de 15 minutos"", informó'l colectivu. Con esti paru, la organización pro defensa de la llingua asturiana ""quier reclamar el sofitu que la comunidá universitaria-y tien que dar al asturianu como llingua propia d'Asturies, naguando pola so inclusión nos planes d'estudiu ensin discriminaciones de nenguna triba"". L'asturianu tien que tener un encaxe amañosu na Facultá de Filoloxía y, por estensión, na Universidá d'Uviéu.

Arriendes d'eso, ""hai que falar de los alcuerdos algamaos va muncho na Universidá, y recordar que yá nel añu 1996 la Facultá de Filoloxía demandó la creación d'una llicenciatura de Filoloxía Asturiana"", señala la Xunta. Tamién recordó la ""unanimidá algamada na Xunta Xeneral nel añu 2001 que, colos votos del PSOE, PP y IU, reclamó la titulación"". ""Los antecedentes amuesen que cualquier solución que nun seya un títulu de grau dexa al asturianu en una posición de discriminación de baldre y inesplicable que la Xunta Moza y la Xunta pola Defensa de la Llingua Asturiana nun vamos sofitar"", acaba'l comunicáu."