Izquierda Xunida escueye a Noemí Martín pa dirixir Bienestar Social y Vivienda, y a Aurelio Martín pa Mediu Rural

"El Conseyu políticu d'IX propunxo nel so conceyu d'ayeri a Noemí Martín pa dirixir la Conseyería de Bienestar Social, Vivienda y Cooperación y a Aurelio Martín pa Mediu Rural. La propuesta plantegóse nel conceyu nel que s'aprobó l'acuerdu de Gobiernu col PSOE con 126 votos a favor (90,65%), nueve a la escontra (6,47%) y 4 astenciones (2,48), según informó la coalición nuna nota prensa.

Según les intervenciones realizaes pol coordinador xeneral d'IX, Jesús Iglesias, y los secretarios d'organización y comunicación, Ángel González y Pablo Prieto, el ""pautu permite enfrentase a la crisis económica dende la izquierda, garantiza más izquierda nel Gobiernu y supón un cambiu políticu n'Asturies"". De la mesma manera, la coalición considera que la so entrada nel Gobiernu ""garantiza que l'aición de gobiernu va tener dos oxetivos, que son dar respuesta a los problemes de la xente y solucionar los retos de futuru n'Asturies"".

La nueva conseyera aseguró güei que'l retu que-y toca asumir ye ""mui importante"" y añadió que tien dos años y mediu per delantre qu'espera tengan un balance positivu. Too ello ""siendo conscientes de qu'un Gobiernu compartíu siempre ye un gobiernu complexu nel que va haber dificultaes que va haber que superar"".

Aseguró que llega al Gobiernu nuna etapa ""difícil p'Asturies y los asturianos"", polo qu'indicó que dende la so formación aspiren a contribuyir a evitar que la crisis la paguen los más desfavorecíos. ""La responsabilidá que me va toca exercer nun futuru tien muncho que ver cola contribución a que les persones con situación más precaria y díficil vean amenorgaes les consecuencies de la crisis y tengan unes condiciones de vida digna"", dixo Martín.

Respecto al equipu de la Conseyería, Martín afirmó que ""tovía ta n'alderique n'IX"". Sicasí, aseguró que la so cartera n pasada llexislatura --con Laura González, tamién d'IX, al frente-- contó con mui bon equipu, colo que ""hai un plus que ye la esperiencia d'eses persones que yá trabayaron demientres cuatro años nos mesmos asuntos"".

""Más allá de que tovía ta pendiente de zarru, evidentemente la mio intención ye contar na midida de les mies posibilidaes cola mayor parte de la xente qu'ocupó yá nel anterior mandatu responsabilidaes nesta Conseyería"", dixo Martín, qu'añadió que ""va siguir calteniénodse básicamente la estructura de responsabilidaes actual""."