Llangréu tien cita cola cerveza artesano

Quince productores participen nel FICAL, que tien una importante vertiente musical, con conciertos de formaciones como Felpeyu, Skama la Rede, Reincidentes o Hamlet.

Los xardinos de la Pinacoteca Municipal Eduardo Úrculo acueyen un añu más el Festival Internacional de Cerveza Artesano de Llangréu (FICAL). Dende güei y hasta'l domingu los asistentes van poder disfrutar de la producción d'un total de quince ellaboradores, amás d'una amplia axenda d'actividaes qu'inclúin tasties o charres.

Nesta ocasión van contar con puestu nel FICAL Yria, Siren, Bidassoa, Naparbier, Laugar, Four Lions, Redneck, Dougall's, Basqueland, Garagart, Curuxera, Santo Cristo, Caleya, De Mole y Garriella, a lo qu'hai que sumar una variada ufierta de comida gracies a la presencia de seis camionetes. L'actividá va comenzar esta tarde, a les 19 hores, col pregón de la presentadora de 'El picu', Ana Francisco, anque una hora enantes yá se va dexar notar la Banda Gaites Conceyu de Llangréu pel llugar.

La música asturiana va protagonizar la primer xornada nel escenariu principal, coles actuaciones de los Gaiteros del Carbón (21.45 hores), Felpeyu (23 hores), Skama la Rede (00 hores) y La Tarrancha (1.30 hores). Mentes, mañana van visitar La Felguera dos grupos con una amplia trayeutoria y munchos siguidores nel país, como los andaluces Reincidentes (00.30 hores) y los madrilanos Hamlet (1.45 hores), que se van a sumar a otros nacionales como Sound of Silence (23.45 hores) o Chamako Wey (3 hores), ente otros.

El domingu van siguir los conciertos y les charres, pa poner el ramu a les 18 hores cola entrega de premios. L'accesu al recintu los trés díes ye de baldre.