El Principáu va crear en próximos meses una estructura pa facilitar el rodaxe de películes n'Asturies

"El Gobiernu del Principáu va crear nos próximos meses una estructura que facilite los rodaxes n'Asturies a los profesionales del cine y la televisión, según informó l'executivu autonómicu nuna nota prensa. De la mesma manera, la Fundación Niemeyer va tener n'Avilés, nes instalaciones qu'agora mesmo tán construyéndose y que van abrir les sos puertes nel 2010, un Film Center apadrináu, ente otros, por Woody Wllen, y otros cineastes de prestixu.

El Principáu foi escenariu d'un centenar de películes dende'l nacimientu del cine, y güei preestrénase na LABoral el film 'Cenizas del cielo', que contó con una ayuda de 400.000 euros del Gobiernu asturianu.

El presidente del Principáu, Vicente Álvarez Areces, va asistir esta nueche nel Teatru de Laboral, Ciudá de la Cultura al preestrenu de la película del cineasta asturianu José Antonio Quirós. 'Cenizas del cielo' ganó'l Gran Premiu de la estaya natural TIFF del Festival de Tokio. La película estrénase'l vienres nos cines de toa España.

Calificada como la primer película medioambiental española, 'Cenizas del cielo', rodóse principalmente nel valle de La Ribera, pero tamién tien escenes de Xixón, Mieres, Morcín y Uviéu. La banda sonora cuerre a cargu d'otro artista asturianu, el compositor Ramón Prada. Nel conxuntu d'actores figuren Celso Bugallo, ganador d'un Goya al meyor actor de repartu por 'Mar Adentro', y la xixonesa Beatriz Rico. Na película tamién actúen, ente otros intérpretes, Clara Segura, Gary Piquer, Fran Sariego, Txema Blasco, Raquel Hevia, Eduadrdo Antuña, Nicolás Fernández Luna y Carlos Kaniowski. José Antonio Quirós se confirmó como ún de los directores con más talentu d'España, gracies al éxitu de la so ópera prima 'Pídele cuentas al rey'.

El Gobiernu del Principáu d'Asturies participó nos dos últimos años en dellos proyeutos cinematográficos rellacionaos con Asturies, ente los que destaquen la contribución al proyeutu 'Primeras Tomas' (900.000 euros) pa descubrir a nuevos directos y fomentar al avaremientu de la industria del cine española al Principáu. 'Primeras tomas' recibió la reconocencia internacional y l'ayuda al desarrollu per parte del programa Media de la Unión Europea.

Amás, el Principáu d'Asturies patrocinó películes como 'La Torre de Suso' (Tomás Fernández), 'Oviedo Express' (Gonzalo Suárez) y 'Tres Mujeres' (Javier Elorrieta). Y concedió ayudes a 'Luz de Domingo' (José Luis Garci), 'El Orfanato' (Juan Antonio Bayona), 'Pudor' (David Ulloa y Tristán Ulloa), 'Proyecto Killer' (Corto. Nacho Carballo) o 'The Frost' (Ferrán Audí).

Les aportaciones económiques de los presupuestos autonómicos a estos trabayos superen 1,2 millones d'euros. De la mesma manera, la llinia de sovenciones pa cine y videu de la Dirección Xeneral de Promoción Cultural permitió financiar nos dos últimos años un total de 23 proyeutos con una ayuda del Gobiernu asturianu cercana a los 90.000 euros.

Na última ceremonia de los Goya hubo hasta cinco películes con sellu asturianu que llograron 29 candidatures, ente elles 'El Orfanato', qu'al final algamó siete estatuines."