UNA pide la retirada del Plan d'Evaluación del Profesoráu, en base al acuerdu algamáu ente PSOE y IX

"Unidá Nacionalista Asturiana (UNA) pide la retirada del Plan d'Evalución del Profesoráu, en base l'acuerdu algamáu ente PSOE y IX-BA-Verdes, dao que ""atenta escontra la calidá de la enseñanza y escontra la dignidá del profesoráu"", según apuntó en nota prensa.

""Según l'acuerdu de gobiernu qu'acaben de firmar el PSOE y IX-BA-Verdes, el procesu d'evaluación del profesoráu deberá contar colos representantes de los profesores, xustamente lo contrario de lo que pasa nestos momentos"", argumenta UNA.

L'apartáu del acuerdu relativu a la enseñanza non universitaria dexa ""meridianamente claro que va haber un sistema d'evaluación del personal docente negociáu colos representantes de los trabayadores"", reseña la formación.

Nesti sen, calcó en que si'l futuru gobiernu PSOE-IX nun retira esti proyeutu ""va tar tornando en papel myoáu el conteníu del acuerdu, y engañando y defraudando a los 12.000 funcionarios de la enseñanza non universitaria qu'hai n'Asturies, que se tán viendo condenaos a aumentar nun 1% el númberu añal d'aprobaos en cada centru, según esti plan"".

Poro, UNA exixe la retirada darreú del plan hasta que s'acuerde ún nuevu colos sindicatos de la enseñanza por ser un proyeutu ""mercantilista, al tratar a los centros d'enseñanza como centros comerciales, potenciando la ""venta barata"" d'aprobaos y fomentando la competencia ente centros y ente profesores, en función del númberu d'aprobaos que dean a los sos alumnos, qu'amás va ser determinante de los salarios, tolo cual nun va algamar meyorar la calidá educativa, pero sí va forzar al profesoráu a degradase profesionalmente, y perder tamién la so ética personal, al tener qu'aprobar a munchos alumnos, seya cual seya'l so esfuerzu y la so evolución nel procesu d'enseñanza-deprendimientu"".

""Dende UNA pensamos que ye la hora de qu'IX y el PSOE demuestren con fechos lo qu'acordaron per escrito, y retiren darréu'l plan d'evaluación del profesoráu, sustituyéndolo por otru que fomente realmente la calidá de la enseñanza y nun atente escontra la dignidá del profesoráu"", acabó."