El 90 por cientu de los llectores d’Asturies.com ta esmolecíu pola contaminación que sufre’l país

Los altos índices de contaminación esistentes n’Asturies, qu’afeuta al área central del país sobre manera, ye motivu de preocupación pa los usuarios d’Asturies.com que participaron nel nuesu ‘Conceyu Abiertu’. Un 90 por cientu diz tar esmolecíu por esta situación.

La entruga plantegada nesta ocasión foi ‘¿Ta esmolecíu pola contaminación?’, a la que namái un 10 por cientu respondió que ‘Non, considero que nun ye pa tanto y que son necesarios los puestos de trabayu de la industria’. Mentes, el 90 por cientu señaló que ‘Sí, ye un problema grave n'Asturies’.

El nuesu país apaez siempre como ún de los territorios con peor calidá del aire d’Europa, lo que llevó a la Xunión Europea a pidir esplicaciones al Estáu español por esta situación. La sociedá yá comenzó a movilizase énte una situación, entamando l’añu pasáu la plataforma Asturies por un Aire Sano, qu’organizó una manifestación en Xixón esti marzu na que participaron unes 5.000 persones y que viaxó esi mesmu mes a Bruxeles pa denunciar nel Parllamentu Européu la contaminación esistente n’Asturies.

Dende esti momentu yá ye posible participar nun ‘Conceyu Abiertu’ nuevu. Nesta ocasión prestaríanos conocer la opinión de los nuesos llectores sobre les celebraciones relixoses n’Asturies en Selmana Santa.

Na imaxe, cabecera de la manifestación 'Asturies Paraísu Contamináu' celebrada en Xixón el 19 de marzu. Imaxe d'Asturies por un Aire Sano.