La economía española va amenorgar nun 0,2% nel 2009 y el paru va llegar al 15,5% nel 2010

"La Comisión Europea prevé que la economía española entre n'amenorgamientu demientres la segunda metá del añu y creza sólo un 1,3% nel conxuntu del 2008 --una décima menos de lo que pronosticare en setiembre--. Nel 2009, la economía española va amenorgar un 0,2% como consecuencia del impautu de la crisis financiera, la baxada del consumu priváu y l'axuste nel sector de la construcción, según Bruseles.

La recuperación va entamar nel 2010 con un crecimientu del 0,5%, anque va ser nesi añu nel que se sientan los peores efeutos de la crisis. El paru va aumentar hasta'l 15% de la población activa y el déficit públicu va disparase hasta'l 3,2% del productu interior brutu (PIB), penriba de la llende del 3% que marca'l Pautu d'Estabilidá y Crecimientu (PEC).

La inflación va tocar techu nel 2008 asitiándose nel 4,2% y llueu va baxar hasta'l 21% nel 2009, espeyando la cayida de los precios del petroleu dende'l pasáu branu. Sicasí, va volver subir hasta'l 2,8% nel 2010. Pela so parte, el déficit por cuenta corriente va moderase llixeramente dende'l 10,1% del 2007 hasta'l 8,2% nel 2010.

L'executivu avisó de que predominen los riesgos a la baxa pa estes previsiones, puesto que l'axuste de la construcción podía ser mayor del previstu y les restricciones de creitu podíen agravase, lo que diba reducir más el consumu priváu y la inversión. En tou casu, les previsiones de Bruseles son yá muncho más negatives que les del Gobiernu, que prevé un crecimientu del 1,5% pa esti añu y del 1% pal 2009.

España va ser ún de los países de la eurozona que sufra con mayor violencia la crisis financiera y el so impautu sobre la economía real. Sólo Irlanda, que tamién ta viviendo un fuerte axuste inmobiliariu, ta nuna situación peor, con una contraición del 1,5% esti añu y del 0,9% nel 2009. Sin embargu, la so recuperación va ser muncho más rápida que la d'España, puesto que va crecer un 2,4% nel 2010.

Fuera de la eurozona, la economía de Reinu Uníu va contrayer un 1% l'añu que vien va crecer sólo un 0,4% nel 2010. Pela so parte, Francia, Alemaña y Italia van estancase l'añu que vien y va crecer un 0,8%, un 1% y un 0,8%, caún nel 2010. Nel conxuntu de la UE, el crecimientu va baxar un 1,4% nel 2008, al 0,2% nel 2009, y de magar entós va recuperase gradualmente hasta'l 1,1%. Na eurozona, les perspectives son hasta peores: 1,2% de crecimientu esti añu, 0,1% nel 2009 y 0,9% nel 2010."