El Sporting sigue en racha con otru trunfu

"El Sporting de Xixón volvió sumar otru trunfu, esta vez por 3 goles a 1 frente al Numancia de Soria. Nun partíu nel topó más dificultaes de les previstes énte un rival mui ordenáu y nel que tuvo que remontar el gol inicial de los castellanos, los asturianos algamaron otros tres puntos qu'asitien al equipu na mitá de la tabla con 12 puntos. Dase la circunstancia qu'esta ye la cuarta victoria seguida del Sporting en lliga.

Les coses nun emprincipiaron bien pa los locales por cuenta d'un Numancia bien posicionáu que dominaba'l balón frente a un Sporting mui pocu precisu nos primeros minutos. D'esti mou fueorn los sorianos los que s'adelantaren nel marcador nun remate axustáu al palu de Goiría nel minutu 19. A partir d'esti momentu los xixoneses punxeron les piles, retuvieron el balón y desplegaron un xuegu muncho mas ordenáu y ofensivu, llegando nel 32 el gol del empate tres un remate de Matabuena que'l defensa Boris sacó de debaxo los palos, aprovechándose Luis Morán del rechace pa conectar un potente gol de cabeza.

La segunda parte continuó na mesma llinia que la primera, un Sporting que buscaba los goles mientres qu'un bon Numancia trataba d'aguantar los ataques continuos de los asturianos. A la fin llegó'l premiu. Nel 64 el goleador del equipu, Bilic, adelantóse a la defensa soriana rematando de cabeza, superando'l balón al porteru Juan Pablo, qu'amosó una indecisión que supunxo'l segundu gol. El tercer y últimu sería tamién de Bilic al tresformar nel minutu 75 un penalti por manes de Pavón nel área. Tres esta victoria el Sporting queda en mitá de la tabla esperando al so próximu rival, el Racing de Santander. La mala noticia pa los xixoneses foi la lesión de Carmelo a los pocos minutos d'entamar el partíu, una lesión que de momentu nun se sabe cuanto tiempu tendrá al xugador de baxa.

Ficha técnica

Sporting: Cuéllar, Sastre, Gerard, Neru, Canella, Matabuena, Camacho, L. Morán (63'), Carmelo (17'), D. Castro, Bilic (78'), S. Sánchez, Jorge, I. Hdez., Míchel (78'), K. Mateo (17'), Omar, Barral (63')

Numancia: Juan Pablo, Juanra, Pavón, Boris, Cisma, Nagore, Mario (67'), Moreno (72'), Antón, Barkero, Goiria (61'), Diego, Bellvis (72'), Palacios, Dimas, Felipe, Quero (67'), Brit (61') Goles 0-1 (19'): Goiria. 1-1 (32'): Luis Morán. 2-1 (64'): Bilic. 3-1 (75'): Bilic.

Árbitru: Rubinos Pérez. Sacó amarielles a Nagore (47'), Barkero (48'), Gerard (55'), Cisma (65'), Sastre (70') y Quero (79')."