Un cartelu que quier reivindicar la música fecha n’asturianu

Santiago Fano ye l’autor de la imaxe d'esta edición del Día de les Lletres Asturianes.

L’Academia de la Llingua Asturiana (ALLA) quixo contar con un diseñu especial pa un actu, el d’esti añu, “que tien una importancia grande pa nós”, pa lo qu’institución se punxo en contautu con Fano pa la so ellaboración. “Pa un actu tan institucional y con tanta tradición ye una apuesta de diseñu un poco arriesgada, en cuanto a moza. Ye un cartelu que quier reflexar l’arte pop y reivindicar lo que ye ún de los movimientos culturales más importantes d’Asturies nos últimos 40 años, que ye la música n’asturianu”, esplicó l’autor.

El mesmu destaca pol so calter “urbanu y modernu”, nel que queden reflexaos tolos estilos. Asina, pue distinguise nél figures bien conocíes de la escena como Xune Elipe, una panderetera de Muyeres o K-Nalón, con Nacho Vegas, que va actuar nel actu xunto col Coru Al Altu la Lleva, nun llugar destacáu.

Amás, el cartelu inclúi títulos de cantares n’asturianu. “La música n’asturianu dende los últimos 40 años ye’l gran tesoru cultural d’Asturies. Ye ún de los movimientos más importantes y un valor lliterariu a reivindicar”, afirmó Fano.

Na imaxe, Fano y Xosé Antón González Riaño, presidente de l'ALLA.