La última campaña d'escavaciones del xacimientu del Sidrón recupera 57 restos óseos humanos y cuatro de fauna animal

"La conseyera de Cultura y Turismu del Principáu, Encarna Rodríguez Cañas, presentó güei en rueda prensa los resultaos de la última campaña d'escavaciones del xacimientu del Sidrón, que permitió la recuperación de 57 restos óseos humanos y cuatro de fauna animal, asina como 30 restos llíticos.

Xunto a la conseyera espardieron la relevancia de les atopadures el director xeneral de Patrimoniu Cultural, Adolfo Rodríguez Asensio, y los responsables de la investigación Javier Fortea y Marco de la Masilla.

Según esplicaron los espertos los avances que se produxeron nes campañes entamaes en 1999 permiten disponer d'información de relevancia pa conocer les característiques de los Neandertales.

Asina, los últimos estudios apunten que la dotación de los restos alcontraos nel Sidrón s'asitien en 50.000 años, superior a los 43.000 años estimaos de primeres. Tamién s'avanzó na recuperación d'ADN neandertal, col estudiu de los restos tanto del Sidrón como d'otros xacimientos europeos, n'especial el de la Vindija, en Croacia, que permiten aproximase a les sos característiques y les causes de la so estinción.

Hasta'l momentu, nel Sidrón s'identificaron un mínimu de nueve individuos --cinco adultos, dos adolescentes, un mozu y un neñu-- anque nun se decarta que les nueves atopadures puean pertenecer a nuevos individuos, a la espera de la evaluación que se ta realizando en Madrid.

Ente los restos acabantes d'alcontrase destaquen dellos molares humanos, un fémur d'osu y una falanxe de pequeñu carnívoru. Sigue asina calteniéndose la teoría d'una escasa fauna animal nel entornu del xacimientu, según apuntó Fortea.

El director de la escavación, Javier Fortea, tamién reseñó la importancia del sumidoriu del xacimientu, que constituyó la entrada, distribución y conservación de los restos alcontraos. Asina, apuntó que la próxima campaña va entamar na zona onde se llocalizaron afayamientos los últimos díes de l'actual.

MUSÉU DEL NEARDENTAL

La singularidá del xacimientu y la so repercusión científica internacional dieron impulsu a la iniciativa del Gobiernu del Principáu d'Asturies pa sacar a subasta pública enantes de final d'añu'l proyeutu de construcción del Muséu del Neardental, en Villamayor (Piloña), que va permitir disponer d'un centru d'interpretación, asina como facilitar a la población de conocencia sobre los neardentales.

Hasta'l momentu, la Conseyería de Cultura y Turismu financió les escavaciones con cerca d'un millón d'euros, de los qu'esti añu 2008 destináronse 173.795 euros. Rodríguez Cañas calcó na relevancia del proyeutu y garantizó la continuidá de les escavaciones en próximos años."